ក្រុមព្រះខ័នរាជស្វាយរៀង និងបឹងកេត សុទ្ធតែបានវាយបកផ្តួលគូប្រកួត ដើម្បីរក្សាភាពខ្លាំង និងបន្តឈរនៅលេខរៀងទី១ និងទី២ ប៉ុន្តែក្រុមភ្នំពេញក្រោន បានជួបភាពហ្មងសៅ ជាថ្មីម្តងទៀត នឹងបានធ្លាក់ចេញពីតំបន់ Top4 ផ្ទុយពីនេះ ណាហ្គាវើល បានរំកឹលឡើងមកឈរនៅលេខ៣ដ៏គួរឲ្យកត់សម្គាល់។
សម្រាប់ការប្រកួតដ៏ធំប្រចាំសប្តាហ៍ទី១០ កាលពីថ្ងៃអាទិត្យ ម្សិលមិញនេះ ក្រុមម្ចាស់ផ្ទះ ព្រះខ័នរាជស្វាយរៀង បានជួបសម្ពាធខ្លាំង នៅពេលខ្សែប្រយុទ្ធ Mihaljevic Filip បានស៊ុតបាល់ពិន័យ១១ម៉ែត្របានសម្រេច ដើម្បីជួយឲ្យក្រុមភ្ញៀវ វិសាខា នាំមុខមុន នៅត្រឹមនាទីទី៣៨នោះ។ ប៉ុន្តែឈានចូលតង់ទី២ ខ្សែប្រយុទ្ធដ៏ឆ្នើម Privat រកបានគ្រាប់បាល់តាមស្មើឲ្យក្រុមស្វាយរៀង វិញ នៅនាទីទី៧៤ មុនពេលកីឡាករជប៉ុន Kobayashi Daisuke បានបន្ថែម១គ្រាប់ទៀត នៅនាទីទី៧៨។
យ៉ាងណាក៏ដោយ Mihaljevic Filip បានជួយឲ្យក្រុមវិសាខា តាមស្មើ ២-២ វិញ នៅនាទីទី៨៣ ប៉ុន្តែ Privat រកបានគ្រាប់បាល់ពិឃាតទី២របស់គេ នៅនាទីទី៨៨ ដើម្បីជួយឲ្យក្រុមស្វាយរៀង ឈ្នះ វិសាខា ៣-២ យ៉ាងតានតឹងបំផុត ហើយលទ្ធផលនេះ បានធ្វើឲ្យ ស្វាយរៀង នៅតែអាចការពារទីតាំងកំពូលរបស់ខ្លួន ពីការដណ្តើមយករបស់ក្រុមបឹងកេត បានយ៉ាងជោគជ័យ។
សម្រាប់ការប្រកួត ក្នុងថ្ងៃអាទិត្យជាមួយគ្នានោះ ក្រុមបឹងកេត ក៏បានវាយបកយកឈ្នះក្រុមម្ចាស់ផ្ទះអគ្គិសនីកម្ពុជា យ៉ាងរំភើបផងដែរ ព្រោះបឹងកេត ចាញ់ អគ្គិសនីកម្ពុជា ២-១ នៅតង់ទី១ ប៉ុន្តែនៅតង់ទី២ ពួកគេរកបាន៣គ្រាប់បន្ថែមទៀត ដើម្បីយកឈ្នះ ៤-២ ហើយក្នុងនោះខ្សែប្រយុទ្ធ ម៉ាត់ នូរុណ រកបាន៣គ្រាប់តែម្នាក់ឯង ខណៈ១គ្រាប់ទៀត ជាការស៊ុតបញ្ជូលទីរបស់ខ្សែប្រយុទ្ធវ័យក្មេង សៀន ចន្ធា។
ផ្ទុយពីនេះក្រុមភ្នំពេញក្រោន បានជួបការខកចិត្តខ្លាំង ខណៈពួកគេបានត្រឹម ២-២ ជាមួយក្រុមសូលទីឡូអង្គរ នៅក្នុងទឹកដីខ្លួនឯងនោះ ហើយការចែកគ្នាម្នាក់១ពិន្ទុនេះ បានរុញទម្លាក់ ភ្នំពេញក្រោន ឲ្យទៅឈរនៅលេខ៥ ខណៈ វិសាខា ក៏បានធ្លាក់ពីលេខ៣ ទៅឈរនៅលេខ៤ផងដែរ ប៉ុន្តែណាហ្គាវើល បានហាក់ពី៥ មកឈរនៅលេខ៣ ក្រោយពួកគេ បានយកឈ្នះក្រុមអាស៊ីអឺរ៉ុប ៤-២ នោះ ហើយក្នុងនោះ ខ្សែប្រយុទ្ធពាក់លេខ១៤ Marcio de Olieira រកបាន៣គ្រាប់តែម្នាក់ឯង។
ចំណែកក្រុមកងយោធពលខេមរភូមិន្ទុ បានយកឈ្នះក្រុមម្ចាស់ផ្ទះគិរីវង់សុខសែនជ័យ ត្រឹម ១-០ ទាំងលំបាកបំផុត ហើយនៅក្នុងការប្រកួតដ៏តានតឹងនេះ អ្នកចាំទី គង់ រ៉ាហ្វាត់ របស់គិរីវង់សុខសែនជ័យ បានរងរបួសរហូតដល់សន្លប់ និងត្រូវបានបញ្ជូនទៅកាន់មន្ទីរពេទ្យភ្លាមៗ។ រីឯក្រុមនគរបាលជាតិ បានត្រឹមស្មើ ១-១ ជាមួយក្រុមយុវជនបាល់ទាត់ជាតិបាទី ដែលធ្វើឲ្យពួកគេ បន្តឈរនៅលេខរៀងទី១១ដដែល៕