ប្រទេសអង់គ្លេស៖ ខ្សែបម្រើ James Milner របស់ក្លិប Liverpool បានតឿនរំឭកដល់មិត្តរួមក្រុមរបស់ខ្លួនថា ពួកគេនឹងទទួលបានការដាក់ទណ្ឌកម្ម សម្រាប់ការបាត់បង់ការផ្តោតអារម្មណ៍ ក្រោយពីឈ្នះពានក្របខ័ណ្ឌ Premier League។
ក្រុមរបស់លោក Jurgen Klopp បានបញ្ចប់ការរង់ចាំរយៈពេល៣០ឆ្នាំ តាមរយៈការក្លាយជាម្ចាស់ជើងឯកអង់គ្លេស កាលពីខែមិថុនា។ ទម្រង់លេងរបស់ពួកគេបានធ្លាក់ចុះភ្លាមៗ ក្រោយពីបានឈ្នះពាន ខណៈដែលការរងបរាជ័យ២លើកក្នុងចំណោមការចាញ់ទាំង៣លើកក្នុងការប្រកួតលីក ដែលពួកគេបានជួបប្រទះនៅរដូវកាលនេះ បានកើតឡើងក្នុងការប្រកួត៧លើកចុងក្រោយរបស់ពួកគេ ស្របពេលដែលកំណត់ត្រាដ៏ល្អឥតខ្ចោះរបស់ពួកគេ បានបញ្ចប់តាមរយៈការបញ្ចប់ក្នុងលទ្ធផលស្មើជាមួយនឹងក្រុម Burnley។ បច្ចុប្បន្ន កីឡាករទាំងអស់កំពុងតែសម្រាកវិស្សមកាល នៅមុនពេលការប្រកួតមិត្តភាពមុនបើករដូវកាលចាប់ផ្តើម ប៉ុន្តែ Milner ដែលបានឈ្នះពាន២លើកក្នុងរយៈពេល៣ឆ្នាំជាមួយនឹងក្លិប Manchester City បានបញ្ជាក់ថា ពួកគេត្រូវតែផ្លាស់ប្តូរ នៅពេលដែលពួកគេវិលទៅប្រកួតវិញ។
កីឡាករវ័យ៣៤ឆ្នាំរូបនេះបានប្រាប់គេហទំព័រ Liverpool.com ថា៖ «ខ្ញុំគិតថា វាមានតុល្យភាពនៅពេលនេះ។ យើងត្រូវតែរីករាយ ពីព្រោះយើងដឹងពីភាពលំបាកក្នុងការឈ្នះពាន។ ប៉ុន្តែ យើងនឹងរងនូវការដាក់ទណ្ឌកម្ម ប្រសិនបើយើងមិនរក្សាការផ្តោតអារម្មណ៍ទេនោះ»៕
ប្រភពព័ត៌មាន៖ Channel News Asia
