ប្រទេសអង់គ្លេស៖ ក្លិបបិសាចក្រហម Manchester United ក្នុងស្ថិតក្នុងការចរចាដែលកំពុងតែដំណើរការទៅមុខ ជាមួយនឹងក្លិប Borussia Dortmund ដើម្បីចុះហត្ថលេខាជាមួយនឹងកីឡាករ Jadon Sancho សម្រាប់តម្លៃខ្លួនជាគោលចំនួន១០០លានអឺរ៉ូ (ស្មើនឹង១១៤លានដុល្លារអាមេរិក) ដែលជាតម្លៃខ្លួនមួយដែលនឹងបំបែកកំណត់ត្រាផ្ទេរសម្រាប់កីគឡាករអង់គ្លេសម្នាក់។
Man United បានចាប់អារម្មណ៍ទៅលើ Sancho ជាយូរមកហើយ ខណៈដែលការពិភាក្សានានាជុំវិញការផ្ទេរមួយលើអតីតកីឡាកររបស់ក្លិប Manchester City បានស្ថិតក្នុងភាពក្តៅគគុកក្នុងរយៈពេលប៉ុន្មានសប្តាហ៍ចុងក្រោយនេះ។ ស្របពេលដែលមិនទាន់មានការព្រមព្រៀងគ្នាណាមួយជាមួយនឹងក្លិប Dortmund មិនឈានដល់នោះ គេយល់ឃើញថា ក្លិបរបស់អាល្លឺម៉ង់មួយនេះអាចនឹងទទួលយកកិច្ចព្រមព្រៀងគ្នាមួយដែលនឹងតម្រូវឲ្យក្លិប Man United បង់រំលស់នៅលើតម្លៃខ្លួន ក្នុងរយៈពេល២ ឬ៣រដូវកាលបន្ទាប់ ដើម្បីនាំយកខ្សែប្រយុទ្ធអន្តរជាតិអង់គ្លេសរូបនេះ។ Man United នឹងបន្ថែមទឹកប្រាក់២០លានអឺរ៉ូទៀត ដោយផ្អែកទៅលើទម្រង់លេងរបស់គេ។
Sancho ដែលបានចាកចេញពីក្លិប Man City ក្នុងវ័យ១៧ឆ្នាំ ដើម្បីផ្ទេរទៅកាន់ក្របខ័ណ្ឌ Bundesliga កាលពីឆ្នាំ២០១៧ ដើម្បីមានឱកាសលេងក្នុងជម្រើសដំបូងនោះ ត្រូវបានគេជឿជាក់ថា បានបើកចំហឲ្យមានការផ្ទេរ ក្រោយពីបានជួបរដូវកាលដ៏រីករាយមួយ តាមរយៈការស៊ុតបាល់បញ្ចូលទី១៧គ្រាប់ និងជួយឲ្យមិត្តរួមក្រុមរកបាន១៦គ្រាប់ផ្សេងទៀតក្នុងក្របខ័ណ្ឌលីក៕
ប្រភពព័ត៌មាន៖ The Guardian