សំឡេងសន្ធឹកស្គរជ័យ នឹងត្រូវលាន់ឭឡើង នៅពហុកីឡដ្ឋានជាតិមរតកតេជោ នាល្ងាចថ្ងៃសុក្រខាងមុខនេះ ដើម្បីជានិមិត្តរូបនៃពិធីរាប់ថយក្រោយ១០០០ថ្ងៃ ត្រៀមឆ្ពោះទៅកាន់ព្រឹត្តិការណ៍ប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជា ត្រូវធ្វើជាម្ចាស់ផ្ទះ ជាប្រវត្តិសាស្រ្តលើកដំបូង។
ក្រោយពីពិធីរាបថយក្រោយ១០០០ថ្ងៃនេះ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (ស៊ីហ្គេម) លើកទី៣២ ឆ្នាំ២០២៣ ហៅកាត់ថា CAMSOC ក៏នឹងប្រកាសពានរង្វាន់ជូនជយលាភី ដល់បេក្ខជន បេក្ខនារី ដែលឈ្នះការប្រឡងស្លាកសញ្ញា ឬនិមិត្តសញ្ញាស៊ីហ្គេម លើកទី៣២ និងស្លាកសញ្ញាអាស៊ានប៉ារ៉ាហ្គេម លើកទី១១ ឆ្នាំ២០២៣ (Logo-Mascot SEA Games-ASEAN Para Games 2023) ផងដែ។
នៅក្នុងពិធីផ្លូវការដ៏ធំ ដែលមិនធ្លាប់មាននៅកម្ពុជានេះ នឹងត្រូវធ្វើឡើង ក្រោមអធិតីភាពរបស់លោកឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ទៀ បាញ់ ដែលជាប្រធាន CAMSOC និងមន្រ្តីអ្នកមុខ អ្នកការ របស់ CAMSOC ជាច្រើនទៀត ហើយនៅក្នុងពិធីនោះ ក៏មានការសម្តែងក្បាច់គុន និងសម្តែងសិល្បៈ ដើម្បីអប់អរផងដែរ ជាមួយពាក្យស្លោករបស់ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ គឺកីឡារស់ក្នុងសន្តិភាព។
បើតាមកម្មវិធីផ្លូវការរបស់ CAMSOC ដែលបានរៀបចំត្រៀមរួចជាស្រេចនោះ គឺកម្មវិធីនៅថ្ងៃសុក្រ ទី៧ ខែសីហា ឆ្នាំ២០២០ ខាងមុខនេះ នឹងចាប់ផ្តើមដោយរបាំជូនពរ នៅម៉ោង៥តទៅ មុនពេលលោករដ្ឋមន្រ្តី ថោង ខុន ដែលជាអនុប្រធានអចិន្រ្តៃយ៍ CAMSOC ថ្លែងសន្ទរកថា ព្រមទាំងកិច្ចសំណេះសំណាល និងអនុសាសន៍ណែនាំរបស់លោកឧបនាយករដ្ឋមន្រ្តី ទៀ បាញ់។
បន្ទាប់មក CAMSOC នឹងប្រកាសបេក្ខជន បេក្ខនារី ដែលទទួលបានជយលាភី នៅក្នុងការប្រឡងគំនូ សម្រាប់ Logo-Mascot SEA Games-ASEAN Para Games 2023 និងការផ្តល់ប្រាក់រង្វាន់លើកទឹកចិត្ត ទៅដល់អ្នកឈ្នះជយលាភី ហើយក្រោយមក នឹងមានការសម្តែងក្បាច់គុនល្បុក្កតោ និងកីឡារាំ ព្រមទាំងការសម្តែងសិល្បៈ មុនឈានទៅដល់ពិធីរាប់ថយក្រោយ១០០០ថ្ងៃ ដោយមានសន្ធឹកស្គរជ័យ អបអរសាទរ ដើម្បីបញ្ជាក់ពីការត្រៀមរបស់កម្ពុជា ក្នុងការឆ្ពោះទៅធ្វើជាម្ចាស់ផ្ទះការប្រកួតស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១១ នៅឆ្នាំ២០២៣៕
