ក្រុមកំពុងគ្រប់គ្រងតំបន់កំពូលតារាងនៃលីកកំពូលកម្ពុជា ឆ្នាំ២០២០ព្រះខ័នរាជស្វាយរៀង បានមើលឃើញថា ទីតាំងលេខ១របស់ពួកគេ កំពុងតែស្ថិតនៅក្នុងការគ្មានស្ថិរភាព ខណៈក្រុមមានមូលដ្ឋាននៅខេត្តស្វាយរៀង មួយនេះ ត្រូវធ្វើដំណើរមកជួបក្រុមខ្លាំង វិសាខា នៅកីឡដ្ឋានស្តាតចាស់ នាល្ងាចម៉ោង៦ ថ្ងៃសៅរ៍នេះ។
បើទោះបីជា ក្រុមស្វាយរៀង ទើបតែយកឈ្នះក្រុមខ្លាំង សម្បូរធនធាន វិសាខា ៣-២ កាលពីសប្តាហ៍មុន ប៉ុន្តែគ្រូជំនួយក្រុមស្វាយរៀង លោក ជូ សារឿន បានចាត់ទុក ណាហ្គាវើល ជាឧបសគ្គធំ១ ក្នុងចំណោមឧបសគ្គធំទាំង២ ដែលក្រុមស្វាយរៀង ត្រូវជួបប្រទះ ព្រោះក្នុង៣ប្រកួតចុងក្រោយ នៅជើងទី១នេះ ស្វាយរៀង ក៏ត្រូវជួបបឹងកេត ផងដែរ។
លោក ជូ សារឿន បាននិយាយថា៖ «ទីតាំងកំពូលតារាង ដែលពួកយើង កំពុងគ្រប់គ្រងពេលនេះ នៅមិនទាន់មានស្ថេរភាព រហូតដល់ចប់ជើងទី១នោះទេ ព្រោះការបន្តទៅជួបក្រុមណាហ្គាវើល និងបឹងកេត សុទ្ធតែជាការប្រកួតដែលលំបាក និងជាឧបសគ្គរបស់យើង ដែលយើងត្រូវតែខំប្រឹងប្រែង និងលេងដោយប្រុងប្រយ័ត្នបំផុត»។
វាជាការពិតណាស់ ក្រុមព្រះខ័នរាជស្វាយរៀង នឹងធ្លាក់ចេញពីកំពូលតារាង នៅសប្តាហ៍ទី១១នេះ បើសិនជាពួកគេ មិនអាចដណ្តើមបាន៣ពិន្ទុ ឬចែកគ្នាម្នាក់១ពិន្ទុជាមួយក្រុមណាហ្គាវើល បានទេនោះ ព្រោះនៅសប្តាហ៍នេះ ក្រុមបឹងកេត ដែលកំពុងឈរនៅលេខ២ ហើយមានពិន្ទុតិចជាង ស្វាយរៀង តែ២ពិន្ទុនោះ ត្រូវបានគេមើលឃើញថា នឹងឈ្នះបាន៣ពិន្ទុបន្ថែម ខណៈពួកគេ ត្រូវជួបក្រុមមានបទពិសោធក្មេងខ្ចី យុវជនបាល់ទាត់ជាតិបាទី នៅថ្ងៃអាទិត្យនោះ។
យ៉ាងណាមិញ ក្រុមណាហ្គាវើល ដែលមាន២១ពិន្ទុ ក៏ត្រូវការឈ្នះជាចាំបាច់ ដើម្បីរក្សាទីតាំងលេខ៣របស់ខ្លួនផងដែរ ខណៈជំនួបជាមួយក្រុមស្វាយរៀង នៅថ្ងៃសៅរ៍នេះ ណាហ្គាវើល បានបង្ហោះនៅលើផេចហ្វេសប៊ុករបស់ខ្លួនថា៖« នេះគឺជាប្រកួតធំប្រចាំសប្ដាហ៍ទី១១ នៃពានរង្វាន់មិត្តហ្វូនខេមបូឌានលីគរដូវកាល ២០២០ ពួកយើង បានត្រៀមខ្លួនរួចហើយ សម្រាប់ទទួលភ្ញៀវដ៏ពិសេស (ស្វាយរៀង) ក្នុងសប្តាហ៍នេះ»៕