បរទេស៖ ខ្សែប្រយុទ្ធ Yussuf Poulsen បានជម្នះលើបញ្ហារបួសកជើង និងកំពុងតែត្រៀមខ្លួនរួចរាល់ដើម្បីជំនួសកន្លែងរបស់ Timo Werner ក៏ដូចជាជួយផ្តល់គ្រាប់បាល់សម្រាប់ក្រុម RB Leipzig ក្នុងការប្រកួតក្របខ័ណ្ឌ Champions League វគ្គ៨ក្រុមចុងក្រោយជាមួយនឹងក្រុម Atletico Madrid។
ក្រោយពីរកបាន៣៤គ្រាប់កាលពីរដូវកាលមុន ក្នុងនោះរាប់បញ្ចូលទាំងការរកបាន៤គ្រាប់ក្នុង Champions League ដែរនោះ កាលពីខែមិថុនា ខ្សែប្រយុទ្ធអន្តរជាតិអាល្លឺម៉ង់ Werner បានចាកចេញពី Leipzig ដើម្បីចូលរួមជាមួយនឹងក្លិប Chelsea របស់ក្របខ័ណ្ឌ Premier League។ បើទោះបីទទួលបានការអនុញ្ញាពី Chelsea ក៏ដោយ ប៉ុន្តែ Werner បានបោះបង់ឱកាសក្នុងការលេងឲ្យក្រុម Leipzig ក្នុងវគ្គ៨ក្រុមចុងក្រោយ ដើម្បីផ្តោតអារម្មណ៍ទៅនឹងការសម្របខ្លួនរបស់គេនៅទីក្រុងឡុងដ៍។ ក្នុងពេលរូបគេអវត្តមាន Poulsenដែលទើបតែបានជាសះស្បើយពីរបួសកជើង កាលពីខែឧសភា នឹងត្រូវចាប់ដៃគូជាមួយនឹងខ្សែប្រយុទ្ធអន្តរជាតិឆែក Patrik Schick ក្នុងទីក្រុង Lisbon។ Poulsen បានប្រាប់ថា៖ «យើងដឹងថា យើងមិនអាចជំនួស Timo បានទាំងអស់ស្រុងភ្លាមៗឡើយ។
ប៉ុន្តែ ខ្ញុំតែងតែដឹងថា គ្រូបង្វឹកមានគំនិតជាច្រើន ដែលយើងអាចអនុវត្ត ហើយយ៉ាងហោចណាស់នឹងមានប្រសិទ្ធភាពក្នុងទីក្រុង Lisbon ដូចដែលយើងបានលេងក្នុង Champions League មុនៗអ៊ីចឹងដែរ»៕
ប្រភពព័ត៌មាន៖ Channel News Asia
