បរទេស៖ ក្លិប Napoli កំពុងស្ថិតយ៉ាងប្រកៀកក្នុងការចុះហត្ថលេខាផ្ទេរយកលើខ្សែការពារកណ្តាលរ Gabriel Magalhaes ពីក្លឹប Lille នៅលីកកំពូលបារាំង Ligue-1។ កីឡាករអន្តរជាតិប្រេស៊ីលវ័យ២២ឆ្នាំបានអភិវឌ្ឍទម្រង់លេងក្នុងនាមខ្សែការពារដ៏ប៉ិនប្រសប់ម្នាក់នៅលីកកំពូលអឺរ៉ុបស្របពេលមានក្លឹបយក្សនៅ Premier League គឺ Manchester United និង Arsenal មានចំណាប់អារម្មណ៍ក្នុងការចុះហត្ថលេខានាំយករូបគេមករួមក្រុមផងដែរ។
ទោះយ៉ាងណាប្រភពពី Manchester Evening News បានចុះផ្សាយថា Napoli បានមានប្រៀបលើការប្រជែងនេះបន្ទាប់ពីចរចារគ្នាត្រូវលើលក្ខខណ្ឌផ្ទាល់ខ្លួនដើម្បីនាំយកកីឡាករវ័យ ២២ ឆ្នាំរូបនេះមករួមក្រុមក្នុងតម្លៃ២២លានផោន។ ដូច្នេះប្រសិនជាការផ្ទេរនេះកើតមានឡើងដូចការគ្រោងទុក នោះ Napoli នឹងមានឆន្ទៈ ដាក់លក់ខ្សែការពារឆ្នើម Kalidou Koulibaly ទៅកាន់ក្លឹបធំៗនៅអឺរ៉ុបជាពិសេសគឺក្លឹបរួមទីក្រុង Man United និង Man City ដែលធ្លាប់បង្ហាញការចាប់អារម្មណ៏ចង់បានកីឡាករអន្តរជាតិសេណេហ្គាល់ដើមកំណើតបារាំងរូបនេះមក រួមក្រុមនោះ។
ទោះយ៉ាងណា Koulibaly គឺជាជម្រើសមួយដែលមានតម្លៃថ្លៃជាង Gabriel ខណៈ Napoli អាចនិងបញ្ចុះតម្លៃ ពី ៩០ លានផោនមកនៅត្រឹម ៧០ លានផោនក៏នៅតែជាតម្លៃមួយដែលក្លឹបធំៗនៅស្ទាក់ស្ទើរនិងហ៊ានចំណាយលុយធំព្រោះតែបញ្ហាវិបត្តិហិរញ្ញវត្តុដោយសាការរីករាលដាលនៃមេរោគកូវីត-១៩៕
ប្រភពព័ត៍មាន៖ Sportsmole
