បរទេស៖ កីឡាករ Andreas Pereira កំពុងត្រៀមចាកចេញពីក្លឹបមុនរដូវកាលថ្មី២០២០-២០២១ចាប់ផ្តើម ក្រោយមិនជាប់ឈ្មោះលេងក្នុងជម្រើសដំបូងសម្រាប់របស់គ្រូបង្វឹកលោក Ole Gunnar Solskjaer ។
កីឡាករសញ្ជាតិប្រេស៊ីលរូបនេះបានបង្ហាញខ្លួនចូលលេងជាទៀងទាត់រហូតពាក់កណ្តាលរដូវកាល ក៏ប៉ុន្តែការមកដល់របស់ Bruno Fernandes និង Paul Pogba នាំអោយឪកាសបង្ហាញខ្លួនរបស់កីឡាករវ័យ២៤ឆ្នាំរូបនេះហាក់ មានកំរិត។ ខ្សែបម្រើដើមកំណើតបែលហ្សិករូបនេះបង្ហាញខ្លួនបានតែ ២ លើកប៉ុណ្ណោះនៅ Premier League ចាប់តាំងពីការប្រកួតចាប់ផ្តើមឡើងវិញក្រោយផ្អាកដោយសារមេរោគកូវីត-១៩ ដោយចូលលេងបានតែ ២៦ នាទីប៉ុណ្ណោះក្នុងការប្រកួត Europa League ទល់នឹង LASK ។
ដូច្នេះហើយអតីតកីឡាករ PSV បានត្រៀមខ្លួនចាកចេញពីទឹកដី Old Trafford ទោះបីជាអ្នកចាត់ការសញ្ជាតិន័រវេលោក Solskjaer បានព្យាយាមបញ្ចុះបញ្ចូល និងធានាដល់រូបគេ ថានៅតែអាចប្រជែងយកតំណែងក្នុងជម្រើសដំបូងក្នុងក្រុមវិញនៅពេលខាងមុខយ៉ាងណាក៏ដោយ៕
ប្រភពព័ត៍មាន៖ Metro