បរទេស៖ លោក Julian Nagelsmann គ្រូបង្វឹករបស់ក្រុម RB Leipzig គ្រោងទប់ស្កាត់ការលេងបែបវាយសម្រុករបស់ក្រុម Paris Saint-Germain ក្រោមជំនួយពីខ្សែប្រយុទ្ធ Neymar និង Kylian Mbappe និងបង្កើតការភ្ញាក់ផ្អើលមួយផ្សេងទៀតក្នុងការប្រកួតក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ នៅរាត្រីនេះ។
Nagelsmann វ័យ៣៣ឆ្នាំ គឺជាគ្រូបង្វឹកវ័យក្មេងបំផុតដែលបានឈានទៅប្រកួតវគ្គ៤ក្រុមចុងក្រោយនៃក្របខ័ណ្ឌ Champions League ហើយនិងព្យាយាមបង្កើតការភ្ញាក់ផ្អើលមួយផ្សេងទៀតសម្រាប់ក្រុម Leipzig ក្រោយពីបានផ្តួលក្រុម Atletico Madrid របស់លោក Diego Simeone ក្នុងវគ្គ៨ក្រុមចុងក្រោយ ពេលពួកគេទៅជួបក្រុម PSG ក្នុងទីក្រុង Lisbon។ លោក Nagelsmann បានឲ្យដឹងកាលពីថ្ងៃចន្ទថា៖ «យើងគឺជាក្រុមមួយដែលអាចដណ្តើមយកឱកាសនានា នៅពេលប្រកួតជាមួយនឹងក្រុមកំពូលៗ នៅអឺរ៉ុប។ យើងបានឃើញរួចជាស្រេចពេលប្រកួតជាមួយនឹងក្រុម Atletico។ ជាមួយគ្នានេះ លោក Thomas Tuchel ដែលជាគ្រូបង្វឹកបានបញ្ជាក់ថា ខ្សែប្រយុទ្ធ Kylian Mbappe រឹងមាំគ្រប់គ្រាន់ដើម្បីចូលលេងក្នុងជម្រើសដំបូងសម្រាប់ក្រុម Paris Saint-Germain ក្នុងពេលប្រកួតជាមួយនឹងក្រុម RB Leipzig។
អំឡុងពេលសន្នីសីទសារព័ត៌មាន នៅមុនពេលការប្រកួត លោក Tuchel បានប្រាប់អ្នកយកព័ត៌មានថា៖ «រូបគេបានលេងរយៈពេល៣០នាទីក្នុងពេលប្រកួតជាមួយនឹងក្រុម Atalanta ហើយមិនមានបញ្ហាអ្វីឡើយ។ រូបគេមានរយៈពេល៦ថ្ងៃ ចាប់តាំងពីពេលនោះមក ដើម្បីពង្រឹងលើភាពរឹងមាំរបស់គេ ហេតុនេះ ពិតណាស់ រូបគេអាចចូលលេងក្នុងជម្រើសដំបូង»។ គ្រូបង្វឹករូបនេះបានបន្ថែមទៀតថា៖ «យើងនឹងកាត់សេចក្តី បន្ទាប់ពីការហ្វឹកហាត់ថា រូបគេអាចលេងបាន៩០នាទី ឬអត់»៕
ប្រភពព័ត៌មាន៖ Channel News Asia
