បរទេស៖ ក្លិប Barcelona នៅតែចង់រៀបចំក្រុមរបស់ខ្លួនឡើងវិញ ក្រោមជំនួយពីប្រធានក្រុម Lionel Messi និងរិះរកគ្រប់វិធីសាស្ត្រទាំងអស់ ដើម្បីរក្សាទុកតារាឆ្នើមអន្តរជាតិអាហ្សង់ទីនរូបនេះ។
នេះបើយោងទអៅតាមការបញ្ជាក់របស់លោក Ramon Planes ដែលជារដ្ឋលេខាធិការបច្ចេកទេសទើបចូលកាន់តំណែងថ្មី កាលពីថ្ងៃពុធ។ ក្រុមមេធាវីរបស់ Messi កាលពីថ្ងៃអង្គារ បានផ្ញើឯកសារមួយទៅកាន់ក្លិប Barcelona ដើម្បីសម្តែងពីបំណងរបស់ខ្សែប្រយុទ្ធវ័យ៣៣ឆ្នាំរូបនេះ ដើម្បីប្រើប្រាស់លក្ខខណ្ឌចងក្នុងកិច្ចសន្យារបស់គេ ដែលនឹងអនុញ្ញាតឲ្យរូបគេចាកចេញ ដោយគ្មានតម្លៃខ្លួន។ ប៉ុន្តែ ទោះបីជាយ៉ាងណា ក្លិប Barcelona បានបញ្ជាក់ថា លក្ខខណ្ឌនោះ បានផុតកំណត់ហើយ ហើយក្លិបជាគូប្រជែង ត្រូវតែបង់ប្រាក់លួសកិច្ចសន្យារបស់គេចំនួន៧០០លានអឺរ៉ូ (ស្មើនឹង៨២៧លានដុល្លារអាមេរិក) ប្រសិនបើរូបគេចង់ចាកចេញដោយមិនចាំបាច់មានការយល់ពីក្លិបសាម៉ី។
លោក Planes បានប្រាប់អ្នកយកព័ត៌មានថា៖ «Barca និង Leo គឺដូចជាប្តីប្រពន្ធរៀបការជាមួយគ្នាអ៊ីចឹង ដោយអ្នកទាំង២ បានបំពេញសេចក្តីត្រូវការឲ្យគ្នាជាច្រើន និងបាននាំយកភាពរីកររាយជាច្រើនដល់អ្នកគាំទ្រ»។ បុរសរូបនេះបានបន្ថែមទៀតថា៖ «នេះគឺជាពិតជាសំខាន់ណាស់ ប៉ុន្តែ គំនិតរបស់យើងក្នុងក្លិបនេះ គឺនៅតែជាការបង្កើតវដ្តនៃជ័យជម្នះជាថ្មីជុំវិញកីឡាករដ៏ឆ្នើមបំផុតរបស់ពិភពលោករូបនេះ»៕
ប្រភពព័ត៌មាន៖ Channel News Asia
