បរទេស៖ ក្រោយពីត្រឹមតែរយៈពេល១សប្តាហ៍ បើគិតចាប់តាំងពីការបញ្ចប់ដំណើរផ្សងព្រេងរបស់ពួកគេក្នុងក្របខ័ណ្ឌ Champions League នៅទីក្រុង Lisbon ក្រុម Lyon វិលទៅកាន់ការប្រកួតក្របខ័ណ្ឌលីកក្នុងស្រុកវិញនៅរាត្រីនេះ ក្នុងពេលត្រូវធ្វើជាម្ចាស់ផ្ទះទទួលក្រុម Dijon ដោយសង្ឃឹមថា អាចទម្លាក់ក្រុម Paris Saint-Germain ដើម្បីឈ្នះពាន Ligue 1 ជាលើកទី១ បើគិតចាប់តាំងពីឆ្នាំ២០០៨។
Lyon បានឈានទៅកាន់ការប្រកួតក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ ជាលើកទី២ ក្រោយពីបានទម្លាក់ក្រុម Juventus និង Manchester City នៅមុនពេលចាញ់ក្រុមម្ចាស់ជើងឯក Bayern Munich ខណៈដែលបារាំង មានក្លិប២ នៅក្នុងវគ្គ៤ក្រុមចុងក្រោយក្នុងយុទ្ធនាការនេះជាលើកទី១។ បើទោះបីធ្វើបានយ៉ាងល្អនៅក្នុងយុទ្ធនាការនេះក៏ដោយ រដូវកាលឆ្នាំ២០២០-២០២១ នឹងក្លាយជារដូវកាលទី១របស់ក្រុម Lyon ដែលខកខានក្នុងក្របខ័ណ្ឌអឺរ៉ុប ក្នុងរយៈពេល២៤ឆ្នាំ ក្រោយពីពួកគេបានបញ្ចប់ក្នុងចំណាត់ថ្នាក់លេខ៧ នៅក្នុងក្របខ័ណ្ឌបារាំង កាលពីរដូវកាលមុន។
ខ្សែការពារ Fernando Marcal បានឲ្យដឹងថា៖ «យើងចង់បង្ហាញថា យើងមានក្រុមដ៏អស្ចារ្យមួយ និងបង្ហាញថា យើងអាចលេងក្នុងក្របខ័ណ្ឌ Champions League ម្តងទៀត នៅរដូវកាលក្រោយ»។ កីឡាកររូបនេះបានបន្ថែមទៀតថា៖ «ខ្ញុំគិតថា ក្រោមការខិតខំព្យាយាមយ៉ាងខ្លាំង យើងអាចប្រជែងតំណែងលេខ១ និងពានបាន។ នោះគឺជាគោលដៅរបស់យើង និងមិនចង់បញ្ចប់ក្នុងចំណត់ថ្នាក់លេខ២ ឬលេខ៣ឡើយ»៕
ប្រភពព័ត៌មាន៖ Channel News Asia
