បរទេស៖ ខ្សែប្រយុទ្ធជើងចាស់ Zlatan Ibrahimovic បានបន្តកិច្ចសន្យារយៈពេល១ឆ្នាំទៀតជាមួយនឹងក្លិប AC Milan។ នេះបើយោងទៅតាមការប្រកាសរបស់ក្លិបយក្សមួយនេះ កាលពីថ្ងៃចន្ទ។ អតីតតារាឆ្នើមអន្តរជាតិស៊ុយអែតរូបនេះ ដែលឈានវូលវ័យ៣៩ឆ្នាំនៅខែតុលា បានវិលទៅកាន់ក្លិប AC Milan កាលពីខែមករា ហើយនិងបន្តនៅកីឡដ្ឋាន San Siro រហូតដល់ចុងខែមិថុនា ឆ្នាំ២០២១។
ក្លិបបានឲ្យដឹងក្នុងសេចក្តីថ្លែងការណ៍មួយថា៖ «នៅថ្ងៃនេះ (ថ្ងៃចន្ទ) Zlatan Ibrahimovic បានចូលរួមជាមួយនឹងមិត្តរួមក្រុម និងលោកគ្រូបង្វឹក Stefano Pioli ជាថ្មីនៅមជ្ឈមណ្ឌលកីឡា Milanello ដែលជាកន្លែងរូបគេបានចូលរួមក្នុងការហ្វឹកហាត់ជុំទី១នៅរដូវកាលនេះ»។ Ibrahimovic បានចូលរួមជាមួយនឹងក្រុមរបស់លោក Pioli កាលពីពាក់កណ្តាលរដូវកាលមុន ដោយបានស៊ុតបាល់បញ្ចូលទី១១គ្រាប់ ក្នុងការប្រកួត២០លើកក្នុងរាល់យុទ្ធនាការទាំងអស់ ដើម្បីជួយឲ្យក្រុមម្ចាស់ជើងឯកទ្វីបអឺរ៉ុប៧សម័យកាលមួយនេះ ឈ្នះកៅអីទៅលេងក្នុងក្របខ័ណ្ឌ Europa League។
កាលពីមុន កីឡាករវ័យ៣៨ឆ្នាំរូបនេះ បានលេងឲ្យក្លិប AC Milan ពីរដូវកាលឆ្នាំ២០១០ ដល់២០១២ ដោយបានស៊ុតបាល់បញ្ចូលទី៥៦គ្រាប់ និងឈ្នះពានក្របខ័ណ្ឌ Serie A ឆ្នាំ២០១១ ក្រោមការដឹកនាំរបស់លោក Massimiliano Allegri៕
ប្រភពព័ត៌មាន៖ Channel News Asia