បរទេស៖ RB Leipzig បានក្លាយជាក្លឹបនៅលីកកំពូលអាឡឺម៉ង់ Bundesliga ដំបូងគេ ដែល បានផ្តល់ភ្លើងខៀវដើម្បីអនុញ្ញាតឱ្យអ្នកគាំទ្រមួយចំនួនចូលទស្សនាការប្រកួតនៅកីឡដ្ឋានរបស់ពួកគេសម្រាប់ការប្រកួតបើករដូវកាលថ្មី២០២០-២០២១នេះ ។ទោះយ៉ាងណាអ្នកគាំទ្រទាំងអស់គឺមានពត៌មានសុខភាពជាក់លាក់ និង ជាប្រជាជនដែលមកពីក្នុងតំបន់នោះព្រមទាំងត្រូវពាក់ម៉ាស់នៅលើមុខហើយនឹងត្រូវបានដាក់ជាក្រុមតូចៗ និងមានគម្លាតគ្នាលើកីឡដ្ឋានដែលមានកៅអីសរុប ៤២.០០០កន្លែង ។
កាលពីថ្ងៃអង្គារអាជ្ញាធរសុខាភិបាលប្រចាំទីក្រុង Leipzig បាននិយាយថាប្រិយមិត្តអ្នកគាំទ្រ និងត្រូវបានអនុញ្ញាតិអោយចូលរួមទស្សនានៅក្នុងកីឡាដ្ឋានបានរហូតដល់ទៅ ៨៥០០ នាក់ឯណោះ ។គួរបញ្ជាក់ថាក្រុមឈរលេខរៀងទី៣កាលពីរដូវកាលចាស់ Leipzig ត្រូវជួបនិងក្លឹប Mainz ០៥ នៅថ្ងៃទី 20 ខែកញ្ញា បន្ទាប់ពីអ្នកគាំទ្រនឹងត្រូវបានអនុញ្ញាតអោយចូលមើលការប្រកួតដោយផ្ទាល់ ប្រសិនអត្រានៃការឆ្លងមេរោគកូវីត-១៩ នៅក្នុងតំបន់នោះបានចាត់ទុកថាមានស្ថេរភាពក្នុងកម្រិតមួយ ដែលមិនមានការព្រូយបារម្មណ៏ពីការឆ្លងរាលដាលសាជាថ្មីនោះ ។
អភិបាលក្រុង Leipzig លោក Burkhart Jung បានបញ្ជាក់ប្រាប់បណ្តាញសារពត៌មានបន្ថែមទៀតថាៈជាមួយនឹងការយល់ព្រមនេះយើងចង់បោះជំហ៊ានឆ្ពោះទៅរកភាពធម្មតាវិញ។ យើងដឹងថាជំងឺរាតត្បាតមួយនេះនៅមិនទាន់ទៅណាឆ្ងាយទេ។ ប៉ុន្តែនៅពេលណាដែលអាចធ្វើទៅបាននៅក្រោមលក្ខខណ្ឌតឹងរឹងប្រជាជនត្រូវតែត្រូវបានអនុញ្ញាតឱ្យវិលត្រឡប់ទៅរកទម្លាប់ប្រចាំថ្ងៃរបស់ពួកគេវិញ៕
ប្រភពព័ត៍មាន៖ BBC
