បរទេស៖ ក្លិប Manchester United កាលពីថ្ងៃពុធ បានប្រកាសថា ពីការចុះហត្ថលេខាជាមួយនឹងខ្សែបម្រើដ៏ឆ្នើម Donny van de Beek របស់ក្លិប Ajax ក្នុងតម្លៃខ្លួន៣៩លានអឺរ៉ូ (ស្មើនឹង៤៦លានដុល្លារអាមេរិក)បូករួមទាំងប្រាក់ឧបត្ថម្ភផ្សេងៗទៀត។
លោក Ole Gunnar Solskjaer បានធ្វើឲ្យកីឡាករអន្តរជាតិហូឡង់វ័យ២៣ឆ្នាំរូបនេះ ក្លាយជាកីឡាករចំណូលថ្មីដំបូងគេរបស់លោកក្នុងទីផ្សារដោះដូរកីឡាករនារដូវក្តៅនេះ ក្នុងការផ្ទេរមួយនេះ ដែលអាចកើនតម្លៃខ្លួនដល់ទៅ៤៤លានអឺរ៉ូ (ស្មើនឹង៥២លានដុល្លារអាមេរិក)។ Van de Beek បានដើរតួនាទីដ៏សំខាន់ក្នុងការជួយឲ្យក្រុម Ajax ឈានទៅប្រកួតក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រកាលពីឆ្នាំមុន និងបានចុះហត្ថលេខារយៈពេល៥ឆ្នាំ នៅកីឡដ្ឋាន Old Trafford ជាមួយនឹងជម្រើសបន្ថែម១រដូវកាលទៀត។ Van de Beek បានពន្យល់ថា៖ «ខ្ញុំមិនអាចចាប់ផ្តើមពន្យល់ពីឱកាសដ៏មិនគួរឲ្យជឿមួយ ដែលនាំឲ្យមានការចូលរួមជាមួយនឹងក្លិបមួយ ដែលមានប្រវត្តិសាស្ត្រដ៏អស្ចារ្យបែបនេះ ឡើយ»។ តារាឆ្នើមរូបនេះ បានបន្ថែមទៀតថា៖ «ខ្ញុំសូមថ្លែងអំណរគុណដល់គ្រប់គ្នានៅក្លិប Ajax។
ខ្ញុំបានចម្រើនវ័យនៅទីនោះ ហើយខ្ញុំនឹងតែងតែមានទំនាក់ទំនងពិសេសជានិច្ចជាមួយនឹងក្លិបនេះ។ ពេលនេះ ខ្ញុំត្រៀមរួចរាល់ហើយ ដើម្បីបោះជំហានក្នុងអាជីពរបស់ខ្ញុំ និងបង្ហាញពីកម្រិតលេងដ៏ខ្ពស់បំផុត ហើយគ្មានក្លិបណាដែលមានស្តង់ដារខ្ពស់ជាងក្លិប Manchester United ឡើយ»៕
ប្រភពព័ត៌មាន៖ Channel News Asia
