បរទេស៖ ក្រុមបាល់ទាត់ជម្រើសជាតិអាល្លឺម៉ង់ នឹងធ្វើជាម្ចាស់ផ្ទះទទួលក្រុមជម្រើសជាតិអេស្ប៉ាញ នៅរាត្រីនេះ នៅក្នុងការប្រកួតអន្តរជាតិជាលើកទី១ ក្នុងកីឡដ្ឋានដែលគ្មានអ្នកគាំទ្រ នៅក្នុងប្រវត្តិសាស្ត្ររបស់សហព័ន្ធកីឡាបាល់ទាត់អាល្លឺម៉ង់ ខណៈដែលលោកគ្រូបង្វឹក Joachim Loew ត្រៀមប្រើប្រាស់ក្រុមថ្មីមួយ ដែលអវត្តមានតារាឆ្នើមៗរបស់ក្លិប Bayern Munich។
ជាធម្មតា អ្នកទស្សនាប្រមាណជា៥ម៉ឺននាក់ ត្រូវបានរំពឹងទុកថា នឹងចូលរួមទស្សនានៅកីឡដ្ឋាន Mercedes-Benz-Arena ក្នុងទីក្រុង Stuttgart សម្រាប់ការប្រកួតអន្តរជាតិលើទឹកដីខ្លួនឯង ពេលប៉ះជាមួយនឹងក្រុមជម្រើសជាតិអេស្ប៉ាញ។ ប៉ុន្តែ ដោយសារតែការរាតត្បាតជាសកលរបស់វីរុសកូរ៉ូណា ការប្រកួតអន្តរជាតិជាលើកទី១របស់អាល្លឺម៉ង់ ក្នុងរយៈពេលជិត១០ខែ ត្រូវតែលេងនៅកីឡដ្ឋានដែឡគ្មានអ្នកគាំទ្រ។ សំណើរបស់សហព័ន្ធកីឡាបាល់ទាត់អាល្លឺម៉ង់ ដើម្បីអនុញ្ញាតឲ្យអ្នកគាំទ្រប្រមាណជា៥០០នាក់ ចូលទស្សនាការប្រកួតពាន National League នេះ ត្រូវបានច្រានចោលដោយសហព័ន្ធកីឡាបាល់ទាត់ទ្វីបអឺរ៉ុប ហៅកាត់ថា UEFA។ លោក Fritz Keller ប្រធានសហព័ន្ធកីឡាបាល់ទាត់អាល្លឺម៉ង់ បានទទួលស្គាល់ថា៖ «ការប្រកួតជាប្រពៃណីរវាងក្រុមបាល់ទាត់ជម្រើសជាតិដ៏ខ្លាំងទាំង២ នៅពីមុខកៅអីដែលគ្មានអ្នកគាំទ្រ គឺជារឿងដ៏ឈឺចាប់មួយ»។
អាល្លឺម៉ង់ នឹងត្រូវលេងការប្រកួតអន្តរជាតិ៨លើក នៅចន្លោះខែនេះ និងខែវិច្ឆិកា ហើយលោក Loew ចង់រៀបចំក្រុមកីឡាកររបស់លោកឲ្យបានល្អ នៅមុនពេលយុទ្ធនាការ Euro ២០២០ ដែលត្រូវបានលើកពេលទៅឆ្នាំក្រោយ៕
ប្រភពព័ត៌មាន៖ Channel News Asia
