បរទេស៖ ក្រុមបាល់ទាត់ជម្រើសជាតិបែលហ្ស៊ិក បានលត់ក្រុមជម្រើសជាតិប៉ូឡូញ យ៉ាងចាស់ដៃ ដើម្បីកត់ត្រាជ័យជម្នះក្នុងលទ្ធផល ៦-១ ក្នុងការប្រកួត National League របស់ពួកគេ ក្នុងទីក្រុង Brussels កាលពីថ្ងៃពុធ។ ក្រុមជម្រើសជាតិបែលហ្ស៊ិក បានរងបរាជ័យក្នុងការប្រកួតបើកឆាករបស់ខ្លួន ក្រោមស្នាដៃក្រុមជម្រើសជាតិហូឡង់ ប៉ុន្តែបានឆ្លើយតបវិញ ជាមួយនឹងទម្រង់លេងយ៉ាងល្អ និងបានបញ្ចប់ការប្រកួតនេះ តាមរយៈការរកបានដល់ទៅ៥គ្រាប់ ក្នុងចន្លោះពេលត្រឹមតែ៣០នាទី។
លោក Roberto Martinez គ្រូបង្វឹកនៃក្រុមជម្រើសជាតិបែលហ្ស៊ិក បាននិយាយថា៖ «វាផ្តល់កម្លាំងចិត្តត្រឡប់មកវិញ ក្រោយពីលោកអ្នកបានបាត់បង់ពេលប្រកួតជាមួយនឹងគូប្រកួតរបស់លោកអ្នក ហេតុនេះ វាផ្តល់នូវការលើកចិត្តទឹកបន្ថែម នៅរាត្រីនេះ»។ គ្រូបង្វឹករូបនេះបានបន្ថែមទៀតថា៖ «នៅពេលប្រកួតជាមួយនឹងក្រុមជម្រើសជាតិហូឡង់ យើងមិនសកម្មភាពឡើយ ដោយរង់ចាំ និងគ្មានសុវត្ថិភាព។ ពេលនេះ យើងគឺជាក្រុមវិញ មិនមែនជាបុគ្គលម្នាក់ៗឡើយ»។
ក្រុមជម្រើសជាតិបែលហ្ស៊ិក ទំនងដូចជារងនូវការខកចិត្តមួយផ្សេងទៀតហើយ កាលពីថ្ងៃពុធ ខណៈដែលក្រុមភ្ញៀវបានរកគ្រាប់បាល់នាំមុខមុន ក្រោយពីលេងបាន២៨នាទី ក្រោយពីខ្សែប្រយុទ្ធ Robert Lewandowski បានស៊ុតបាល់បញ្ចូលទី ដើម្បីរកគ្រាប់បាល់ទី២២ សម្រាប់ក្លិប និងប្រទេសរបស់គេនៅឆ្នាំ២០២២នេះ។ ប៉ុន្តែ ក្រុមម្ចាស់ផ្ទះ បានរកគ្រាប់បាល់តាមស្មើវិញ នៅមុនពេលបញ្ចប់តង់ទី១ ហើយបានបន្តរកគ្រាប់បាល់ជាបន្តបន្ទាប់នៅតង់ទី ដើម្បីបំពេញជ័យជម្នះសម្រាប់ក្រុមខ្លួនតែម្តង៕
ប្រភពព័ត៌មាន៖ Channel News Asia
