បរទេស៖ ក្លិបទូកក្តោង Everton បានបំពេញការចុះហត្ថលេខាជាមួយនឹងខ្សែប្រយុទ្ធ James Rodriguez ពីក្លិប Real Madrid កាលីថ្ងៃចន្ទ ដើម្បីធ្វើឲ្យតារាឆ្នើមអន្តរជាតិកូឡុំប៊ីរូបនេះ លេងក្រោមការដឹកនាំរបស់លោក Carlo Ancelotti ជាលើកទី៣។
ក្លិបស្ថិតក្នុងក្របខ័ណ្ឌ Premier League មួយនេះត្រូវបានព័ត៌មានចេញផ្សាយថា បានផ្តល់តម្លៃខ្លួន២២លានផោន (ស្មើនឹង២៩លានដុល្លារអាមេរិក) ដើម្បីនាំយក James វ័យ២៩ឆ្នាំ ដែលជាអ្នករកបានគ្រាប់បាល់ច្រើនជាងគេក្នុងព្រឹត្តិការណ៍ World Cup ឆ្នាំ២០១៤។ ទម្រង់លេងដ៏ល្អរបស់ James នៅលើឆាកពិភពលោក បានជួយឲ្យរូបគេផ្ទេរក្នុងតម្លៃខ្លួន៨០លានអឺរ៉ូ (ស្មើនឹង៩៥លានដុល្លារអាមេរិក) ទៅកាន់ក្លិប Real Madrid កាលពី៦ឆ្នាំមុន ហើយរូបគេបានបង្ហាញពីទម្រង់លេងយ៉ាល្អក្នុងរដូវកាលទី១របស់គេ ក្នុងរដ្ឋធានីរបស់អេស្ប៉ាញ ក្រោមការដឹកនាំរបស់លោក Ancelotti។ ប៉ុន្តែ ទោះបីជាយ៉ាងណា រូបគេបានបាត់បង់តំណែងក្នុងជម្រើសដំបូងក្នុងក្រុមរបស់លោក Zinedine Zidane នៅកីឡដ្ឋាន Bernabeu និងមិនបានបង្ហាញពីកម្រិតលេងដ៏គួរឲ្យចាប់អារម្មណ៍ឡើយក្នុងពេលខ្ចីជើងទៅលេងឲ្យក្លិប Bayern Munich នៅចន្លោះឆ្នាំ២០១៧ និង២០១៩ ដែលពេលនោះរូបគេក៏បានលេងក្រោមការដឹកនាំរបស់លោក Ancelotti ផងដែរ។
James ក្លាយជាកីឡាករចំណូលថ្មីទី២របស់ Everton ក្នុងពេលបើកទីផ្សារដោះដូរកីឡាករនៅពេលនេះ ក្រោយពីការចូលរួមរបស់ខ្សែបម្រើអន្តរជាតិប្រេស៊ីល Allan ពីក្លិប Napoli និងជឿជាក់ថា Everton នឹងជួបអនាគតល្អ បើទោះបីបានបញ្ចប់ក្នុងចំណាត់ថ្នាក់លេខ១២ នៅលើតារាង Premier League កាលពីរដូវកាលមុនក៏ដោយ៕
ប្រភពព័ត៌មាន៖ Channel News Asia