បរទេស៖ ក្រុមបាល់ទាត់ចម្រើសជាតិអ៊ីតាលី បានឡើងទៅឈរនៅលើកំពូលតារាងនៃពូល UEFA Nations League របស់ពួកគេ កាលីថ្ងៃចន្ទ ក្រោយពីបានយកឈ្នះក្នុងលទ្ធផល ១-០ លើក្រុមជម្រើសជាតិហូឡង់ ប៉ុន្តែ ជ័យជម្នះរបស់ពួកគេត្រូវបានរំខាន ដោយសារតែតារាឆ្នើមទើបតែរះ Nicolo Zaniolo អាចនឹងរងរបួសជង្គង់ដ៏ធ្ងន់ធ្ងរម្តងទៀត។
ការតែតបាល់បញ្ចូលទីយ៉ាងល្អរបស់ Nicolo Barella នៅជិតបញ្ចប់ការប្រកួតនៅត់ទី១ គ្រប់គ្រាន់សម្រាប់ក្រុមរបស់លោក Roberto Mancini ក្នុងការដណ្តើមបាន៣ពិន្ទុពេញ នៅក្នុងទីក្រុង Amsterdam និងឡើងឈរនៅលើកំពូលតារាងនៃ National League A ពូល 1។ ក្រុមជម្រើសជាតិអ៊ីតាលី កំពុងតែនាំមុខ១ពិន្ទុលើក្រុមជម្រើសជាតិហូឡង់ ដែលបានលេងក្រោមការដឹកនាំរបស់លោកគ្រូបង្វឹកបណ្ណោះអាសន្ន Dwight Lodeweges ក្រោយពីការចាកចេញរបស់លោក Ronald Koeman ដើម្បីទៅដឹកនាំក្លិប Barcelona និងក្រុមឈរលេខ៣ ប៉ូឡូញ ដែលបានផ្តួលក្រុមជម្រើសជាតិបូស្នីក្នុងលទ្ធផល ២-១។
លោក Mancini បានប្រាប់ទូរទស្សន៍របស់អ៊ីតាលី Rai ថា៖ «ខ្ញុំពិតជាពេញចិត្តចំពោះស្មារតីក្រុម ទម្រង់លេង ហើយកីឡាករពិតជាលេងបានយ៉ាងល្អ»។ លោក Mancini បានផ្លាស់ប្តូរកីឡាករ៧នាក់ពីក្រុមដែលបានបញ្ចប់ក្នុងលទ្ធផលស្មើ ១-១ ជាមួយនឹងក្រុមជម្រើសជាតិបូស្នី កាលពីថ្ងៃសុក្រ ខណៈដែលលទ្ធផលស្មើនេះបានបញ្ចប់ការឈ្នះជាប់ៗគ្នារបស់ពួកគេត្រឹម១១ប្រកួត៕
ប្រភពព័ត៌មាន៖ Channel News Asia
