បរទេស៖ ខ្សែប្រយុទ្ធ Cristiano Ronaldo បានស៊ុតបាល់បញ្ចូលទី២គ្រាប់ ដើម្បីធ្វើឲ្យគ្រាប់បាល់អន្តរជាតិរបស់គេកើនដល់១០១សម្រាប់ក្រុមបាល់ទាត់ជម្រើសជាតិព័រទុយហ្គាល់ ក្នុងពេលពួកគេបានយកឈ្នះលើក្រុមជម្រើសជាតិស៊ុយអែត ក្នុងលទ្ធផល ២-០ ក្នុងការប្រកួតពាន Nations League កាលពីថ្ងៃអង្គារ ស្របពេលដែលក្រុមជម្រើសជាតិបារាំង បានយកឈ្នះលើម្ចាស់ជើងឯករង World Cup ក្រូអាស៊ី ៤-២។
Ronaldo បានរកគ្រាប់បាល់ទី១០០របស់គេនៅជិតបញ្ចប់តង់ទី១ នៅពេលដែលខ្សែប្រយុទ្ធរបស់ក្លិប Juventus វ័យ៣៥ឆ្នាំរូបនេះ បានស៊ុតបាល់ពិន័យ Free-kick ប្រមាណជា២៧ម៉ែត្រ រំលរបាំងការពារ និងចូលក្នុងជ្រុងម្ខាងនៃទីយ៉ាងល្អ ស្របពេលដែលអ្នកចាំទីស៊ុយអែត Robin Olsen មិនអាចសង្គ្រោះបាល់នោះបានឡើយ។ ក្រោយពីបានបង្ហាញខ្លួនជាអន្តរជាតិក្នុងក្រុមឈុតធំជាលើកដំបូងរបស់គេ ក្នុងវ័យត្រឹមតែ១៨ឆ្នាំ កាលពីឆ្នាំ២០០៣ Ronaldo បានរកគ្រាប់បាល់ទី១របស់គេសម្រាប់ក្រុមជម្រើសជាតិព័រទុយហ្គាល់ ក្នុងពេលចាញ់ក្រុមជម្រើសជាតិក្រិក ក្នុលទ្ធផល ២-១ នាព្រឹត្តិការណ៍ Euro ឆ្នាំ២០០៤។
Ronaldo ដែលបានបង្ហាញខ្លួនចំនួន១៦៥លើកសម្រាប់ក្រុមជម្រើសជាតិព័រទុយហ្គាល់នោះ គឺជាកីឡាករទី២បន្ទាប់ពីខ្សែប្រយុទ្ធអ៊ីរ៉ង់ Ali Daei ដែលរកបាន១០៩គ្រាប់ នៅលើតារាងនៃអ្នករកបានគ្រាប់បាល់ច្រើនជាងគេក្នុងការប្រកួតអន្តរជាតិ៕
ប្រភពព័ត៌មាន៖ Channel News Asia
