បរទេស៖ ខ្សែបម្រើដ៏មានឥទ្ធិពល Kevin De Bruyne បានកោតសរសើរដល់ឥទ្ធិពលរបស់លោក Pep Guardiola ក្រោយពីបានក្លាយជាកីឡាកររបស់ក្លិប Manchester City ដំបូងគេដែលបានឈ្នះពានកីឡាឆ្នើមប្រចាំឆ្នាំរបស់សមាគមកីឡាបាល់ទាត់អាជីពហៅកាត់ថា PFA។
ពានរង្វាន់ប្រចាំឆ្នាំដទៃទៀតរបស់ PFA ត្រូវបានគ្រប់គ្រងដោយកីឡាករក្នុងក្រុម Liverpool ដែលជាម្ចាស់ជើងឯកក្របខ័ណ្ឌ Premier League តាមរយៈការឈ្នះពាន៥ ស្របពេលដែលខ្សែប្រយុទ្ធ Marcus Rashford របស់ក្លិប Manchester United បានឈ្នះពានមួយក្រោយពីបានចូលរួមយ៉ាងសកម្មក្នុងការប្រយុទ្ធប្រឆាំងនឹងភាពក្រីក្ររបស់កុមារ។ Man City ដេញតាមពីក្រោយ Liverpool រហូតដល់១៨ពិន្ទុ ក្នុងក្របខ័ណ្ឌ Premier League រដូវកាលឆ្នាំ២០១៩-២០២០ ប៉ុន្តែ De Bruyne ដែលបានស៊ុតបាល់បញ្ចូលទី១៣គ្រាប់ និងជួយឲ្យមិត្តរួមក្រុមរកបាន២០គ្រាប់ផ្សេងទៀត ត្រូវបានបោះឆ្នោតឲ្យជាប់ជាកីឡាករឆ្នើមបំផុតប្រចាំយុទ្ធនាការ ដោយកីឡាករដូចគ្នា។
De Bruyne បានឲ្យដឹងថា៖ «នេះគឺជាកិត្តិយសដ៏ធំមួយ ដែលត្រូវបានបោះឆ្នោត ដោយសហការី គូប្រកួត មកពីក្រុមផ្សេង ដែលអ្នកតែងតែលេងជាមួយនៅលើទីលាន។ ការដែលពួកគេបឡឆ្នោតឲ្យអ្នកជាប់ជាកីឡាករឆ្នើមបំផុត គឺជារឿងដ៏អស្ចារ្យ»៕
ប្រភពព័ត៌មាន៖ Channel News Asia