បរទេស៖ ខ្សែបម្រើប្រយុទ្ធដ៏មានឥទ្ធិពល Kevin De Bruyne បាននិយាយថា ការឈ្នះបានក្របខ័ណ្ឌ Champions League នឹង «ផ្លាស់ប្តូររឿងរ៉ាវ» ជុំវិញក្រុម Manchester City ស្របពេលដែលពួកគេត្រៀមសម្រាប់ការប្រកួតជើងទី២នៃវគ្គពាក់កណ្តាលផ្តាច់ព្រ័ត្ររបស់ពួកគេ ជាមួយនឹងក្រុម Real Madrid។
ក្រុមរបស់លោក Pep Guardiola នឹងឈានទៅកាន់ការប្រកួតក្នុងប្រទេសអេស្ប៉ាញ នៅរាត្រីនេះ ជាមួយនឹងការនាំមុខ ៤-៣ ក្រោយពីការប្រកួតដ៏រំភើបក្នុងជើងទី១ ខណៈដែលក្រុមម្ចាស់ជើងឯករបស់អង់គ្លេសមួយនេះ នឹងសម្លឹងរកការឈានទៅវគ្គផ្តាច់ព្រ័ត្រជាលើកទី២ជាប់ៗគ្នា។ ជាមួយគ្នានេះ ខ្សែបម្រើអន្តរជាតិបែលហ្ស៊ិក De Bruyne បាននិយាយថា ការឈ្នះបានដ៏ធំនេះ នឹងផ្លាស់ប្តូរការគិតពីអ្នកខាងក្រៅ លើក្រុម Man City ដែលបានរងបរាជ័យក្រោមស្នាដៃក្រុម Chelsea ក្នុងវគ្គផ្តាច់ព្រ័ត្រ កាលពីឆ្នាំមុន។ ក្នុងសន្និសីទសារព័ត៌មានមុនការប្រកួត កីឡាកររូបនេះបានឲ្យដឹងថា៖ «ក្នុងនាមជាកីឡាករម្នាក់ យើងចង់ឈ្នះពានជាច្រើន ហើយអ្នកក៏ចង់ឈ្នះពាននេះដែរ។ ពិតណាស់ ខ្ញុំគិតថា ការឈ្នះពាន Champions League នឹងផ្លាស់ប្តូររឿងរ៉ាវជុំវិញ Man City»។
ជាមួយគ្នានេះ លោក Guardiola បានឲ្យដឹងថា៖ «ដើម្បីឈ្នះយុទ្ធនាការនេះ បើតាមបទពិសោធដ៏ស្តួចស្តើងរបស់ខ្ញុំ អ្នកត្រូវតែជម្នះស្ថានភាពនានា ដែលកើតឡើង ហើយអ្នកត្រូវតែលេងឲ្យបានល្អ ក្នុងការប្រកួតទាំង២លើក។ វាជាការល្បងសមត្ថភាពដ៏ល្អសម្រាប់យើង។ យើងត្រូវតែបង្ហាញសមត្ថភាពផ្ទាល់ខ្លួនរបស់យើងក្នុងការប្រកួតនេះ។ យើងនឹងលេងដើម្បីឈ្នះ»៕
ប្រភពព័ត៌មាន៖ Channel News Asia
