ម្ចាស់ខ្សែក្រវាត់២ស្ថាប័ន ឌុម កែវដា មានការជឿជាក់ថា រូបគេ អាចនឹងឈ្នះបានប្រាក់លាន ជាថ្មីម្តងទៀត នៅក្នុងការប្រកួតម៉ារ៉ាតុងដណ្តើមប្រាក់លាន ទម្ងន់៦៣,៥គីឡូក្រាម នៃកម្មវិធី Mas Fight Cambodia នៅលើសង្វៀនថោន នាថ្ងៃអាទិត្យនេះ។
យ៉ាងណាក៏ដោយ ឌុម កែវដា ដែលធ្លាប់បានឈ្នះប្រាក់លានម្តងរួចមកហើយនោះ បានចាត់ទុកថា បេក្ខភាព ឡុង បេនលឿន អាចជាឧបសគ្គ សម្រាប់ការឈានទៅឈ្នះប្រាក់លាន ជាលើកទី២នេះ ចំណែកបេក្ខភាព២នាក់ទៀត មានអតីតមិត្តរួមក្លិប វ៉ែន ហុងជីវង្ស និងជើងថ្មី រិទ្ធ ប៊ុនម៉ៅ មិនស្ថិតនៅក្នុងក្តីបារម្ភរបស់ កែវដា នោះទេ។
សិស្សគណក្លិបមកុដរាជសីហ៍ ឌុម កែវដា បានប្រាប់ប្រព័ន្ធផ្សព្វផ្សាយថា៖«ខ្ញុំរំពឹងឈ្នះប្រាក់លាន ប៉ុន្តែជើងថ្មីវ័យក្មេង ឡុង បេនលឿន មកពីក្លិបសាលវ័ន្តកីឡា ដែលកំពុងឡើងកម្លាំងគឺជាឧបសគ្គធំ សម្រាប់រូបខ្ញុំ ប៉ុន្តែជើងចាស់ វ៉ែង ហុងជីវង្ស ដែលធ្លាប់ជាមិត្តរួមក្លិបជាមួយខ្ញុំ គឺខ្ញុំធ្លាប់វាយឲ្យចុះចាញ់ត្រឹមទឹកទី៣ ចំណែក រិទ្ធ ប៊ុនម៉ៅ គឺគ្មានបញ្ហាលំបាកធំដុំ ក្នុងការយកឈ្នះនោះទេ»។
បើតាមការអះអាងរបស់ ឌុម កែវដា បានឲ្យដឹងថា រូបគេធ្លាប់បានចាញ់ ឡុង បេនលឿន ២លើក និងឈ្នះតែ១លើកទេ សម្រាប់ជំនួប៣លើកកន្លងមក ហើយការបង្ហាញវត្តមានរួមគ្នា នៅក្នុងការដណ្តើមប្រាក់លាននេះ ឌុម កែវដា និង ឡុង បេនលឿន ត្រូវបានគេគិតទុកថា នឹងត្រូវជួបគ្នា គឺបើពួកគេ ចាប់ឆ្នោតមិនប៉ះគ្នា នៅវគ្គជម្រុះ៣ទឹកដំបូង ក៏អ្នកទាំង២នេះ នឹងត្រូវឡើងទៅជួបគ្នា នៅវគ្គផ្តាច់ព្រ័ត្រផងដែរ។
ឌុម កែវដា បានរំឭក និងបញ្ជាក់ថា៖ «ខ្ញុំធ្លាប់ប្រកួតជាមួយ ឡុង បេនលឿន ចំនួន៣លើក ដោយឈ្នះ១ និងចាញ់២លើក គឺចាញ់ផ្នែកកម្លាំង និងស្នៀតជង្គង់នេះតែម្តង ប៉ុន្តែតាមរយៈជំនួប៣លើកនោះ ជួយឲ្យខ្ញុំស្គាល់ពីក្បាច់ប្រកួត បេនបឿន បាន និងមានល្បិចសម្រាប់ទប់ទល់ និងយកឈ្នះ។ បន្ថែមលើនេះ តាមរយៈការហ្វឹកហាត់កម្លាំង និងបច្ចេកទេស ខ្ញុំសង្ឃឹមយ៉ាងខ្លាំងថា នឹងដណ្តើមបានប្រាក់លាន ក្នុងសប្តាហ៍នេះ គឺរំពឹងឈ្នះ៨០ភាគរយ»។
ចំណែក ឡុង បេនលឿន ទើបតែសាងឈ្មោះល្បី ត្រឹមរយៈពេល២ឆ្នាំ ហាក់មិនទាន់ហ៊ានព្យាករពីលទ្ធផលទេ ព្រោះគេរាងញញើត ឌុម កែវដា នេះតែម្តង។ បេនលឿន បាននិយាយថា៖«ខ្ញុំធានាវ៉ៃ អស់ពីសមត្ថភាព ដើម្បីឈ្នះប្រាក់នេះ ប៉ុន្តែមិនហ៊ាននិយាយមុនទេ ព្រោះការជួប ឌុម កែវដា កន្លងមក គឺការឈ្នះ ចាញ់គ្នា មានលក្ខណៈតឹងតែងបំផុត»៕