បរទេស៖ កីឡាករខ្សែបម្រើ-ប្រយុទ្ធស្លាប Hakim Ziyech និងខ្សែការពារឆ្វេង Ben Chilwell និងត្រូវអវត្តមានសម្រាប់ការប្រកួតបើកឆាកក្របខ័ណ្ឌលីគកំពូលអង់គ្លេស Premier League របស់ពួកគេទល់នឹងក្រុមម្ចាស់ផ្ទះ Brighton នៅថ្ងៃអង្គារសប្តាហ៏ក្រោយនេះ។ គួររំលឹកឡើងវិញថា Ziyech កីឡាករដើមកំណើតហូឡង់តែបច្ចុប្បន្នមានសញ្ជាតិម៉ារ៉ុក រូបនេះត្រូវបានក្លឹប មានមូលដ្ឋានៅទីក្រុងឡុងដ៏ ចុះហត្ថលេខាក្នុងកិច្ចព្រមព្រៀង ៣៧ លានផោននាំយកពីក្លិប Ajax ត្រូវបានប្តូរចេញកំលុងពេលការប្រកួតមិត្តភាពនៅតង់ទី ២ មុនបើករដូវកាល Brighton នៅថ្ងៃទី ២៩ ខែសីហានេះ។
មួយវិញទៀតប្រភពពីគេហទំព័រ The Athletic ក៏បានចុះផ្សាយផងដែរថាអ្នកចាត់ការទូទៅលោក Frank Lampard ក៏និងត្រូវប្រឈមនិងអវត្តមានកីឡាករអន្តរជាតិអង់គ្លេស Ben Chiwell ដែលត្រូវបានក្លឹបទិញក្នុងតម្លៃ ៥០ លានផោនពីក្រុមកញ្ជ្រោងខៀវ Leicester City។ Chiwell បានរងរបួសកែងជើងតាំងពីការប្រកួតរវាងអតីតក្លឹប Leicester City ផ្តួលក្រុមស្ទាំងខៀវ Crystal Palace កាលពីថ្ងៃទី ៤ ខែកក្កដាហើយនៅមិនទាន់បានជាសះស្បើយនៅឡើយទេ។
ទោះបីប្រឈមនិងអវត្តមានកីឡាករឆ្នើមទាំងពីររូបនេះក្តី លោក Frank Lampard ហាក់មានក្តីសង្ឃឹមឡើងវិញ ក្រោយពីកីឡាករអន្តរជាតិឆ្នើមគឺខ្សែប្រយុទ្ធស្លាបឆ្វេង Cristian Pulisic ទើបតែវិលត្រលប់មកហ្វឹកហាត់វិញនៅថ្ងៃពុធនេះ។ គួរបញ្ជាក់ថាកីឡាករអន្តរជាតិ អាមេរិករូបនេះទើបតែ ជាសះស្បើយពីរបួសសរសៃពួរពេល Chelsea ចាញ់ Arsenal ក្នុងវគ្គផ្តាច់ព្រ័ត្រ FA Cup ។មួយវិញទៀតនោះគឺខ្សែបម្រើ Kai Havertz និងត្រៀមបង្ហាញខ្លួនជាលើកដំបូងក្រោយផ្ទេរមកទឹកដី Stamford Bridge កាលពីសប្តាហ៍មុន៕
ប្រភពព័ត៍មាន៖ Metro