បរទេស៖ លោក Carlo Ancelotti បានបញ្ជាក់ថា ការជឿជាក់របស់លោកដែលថា ក្រុម Everton នឹងប្រជែងដណ្តើមយកចំណាត់ថ្នាក់កំពូលទាំង៦នៃក្របខ័ណ្ឌ Premier League នៅរដូវកាលនេះ មានភាពស៊ីសង្វាក់គ្នា ក្រោយពីការតែតបាល់បញ្ចូលទីរបស់កីឡាករ Dominic Calvert-Lewin បានជួយឲ្យពួកគេដណ្តើមបានជ័យជម្នះលើក្រុម Spurs ជាលើកដំបូង បើគិតចាប់តាំងពីឆ្នាំ២០១២ តាមរយៈការយកឈ្នះ ១-០ កាលពីថ្ងៃអាទិត្យ។
លោក Ancelotti បាននាំយកកីឡាករថ្មីៗជាច្រើនដូចជា James Rodriguez, Abdoulaye Doucoure និង Allan ហើយក្រុមទូកក្តោងមួយនេះ ហាក់មានកម្រិតលេងរឹងមាំជាង បើធៀបទៅនឹងក្រុមដែលបានបញ្ចប់ក្នុងចំណាត់ថ្នាក់លេខ១២ នៅលើតារាងកាលពីរដូវកាលមុន ខណៈដែលពួកគេបានទទួលជ័យជម្នះយ៉ាងស័ក្តិសមនាកីឡដ្ឋាន Tottenham Hotspur។ លោក Ancelotti បានឲ្យដឹងថា៖ «យើងបានបង្ហាញថា យើងអាចប្រកួតប្រជែងបាន ដែលជាសារដ៏សំខាន់បំផុត។ យើងអាចប្រកួតបាន ប្រសិនបើស្មារតីស្ថិតក្នុងកម្រិតល្អ ប្រសិនបើឥរិយាបថ មានភាពល្អ»។
លោកបានបន្ថែមទៀតថា៖ «ខ្ញុំបាននិយាយនៅមុនពេលការប្រកួតថា គោលដៅរបស់យើងគឺការប្រជែងដណ្តើមយកកៅអីទៅកាន់ក្រខ័ណ្ឌអឺរ៉ុប។ ការប្រកួតទី១ ពិតជាផ្តល់លទ្ធផលល្អ យើងត្រូវតែរង់ចាំមើលការប្រកួតទី២ និងការប្រកួតទី៣ ហេតុនេះ យើងត្រូវតែរង់ចាំបន្តិច ប៉ុន្តែ ខ្ញុំមានការជឿជាក់ជាច្រើន»៕
ប្រភពព័ត៌មាន៖ Channel News Asia
