បរទេស៖ ក្រោយពីបានយកឈ្នះនៅលើទឹកដីក្រុម Leicester City ក្នុងលទ្ធផល ២-១ កាលពីសប្តាហ៍មុន ក្រុម Southampton នឹងសម្លឹងរកការបង្កើតការភ្ញាក់ផ្អើលមួយផ្សេងទៀត ពេលធ្វើជាម្ចាស់ផ្ទះទទួលក្រុមឡើងទម្រង់លេង Manchester United។
បន្ទាប់ពីការប្រកួត៣លើកក្នុងរដូវកាលនេះ ក្រុម Southampton បានចាញ់ក្រុម Tottenham ក្នុងលទ្ធផល ៤-១ នៅថ្ងៃបើកឆាក មុននឹងដណ្តើមបានលទ្ធផលស្មើ ២-២ ជាមួយនឹងក្រុម Leeds United ខណៈដែលពួកគេស្ថិតក្នុងចំណាត់ថ្នាក់លេខ១១ ដោយមាន៤ពិន្ទុ។ ក្រុម Southampton ឈ្នះតែ១លើកគត់ពីការប្រកួតផ្លូវការលើទឹកដីខ្លួនឯង៥លើកចុងក្រោយរបស់ពួកគេ ដោយចាញ់៣លើក។ ដោយឡែក ក្រុម Man United នឹងឈានទៅកាន់ការប្រកួតនេះ ជាមួយនឹងជំនឿចិត្តដ៏ធំ ក្រោយពីបង្ហាញពីទម្រង់លេងយ៉ាងល្អដើម្បីផ្តួលក្រុម Liverpool ក្នុងលទ្ធផល ២-១ កាលពីសប្តាហ៍មុន បន្ទាប់ពីចាញ់ក្រុម Brighton ២-១ កាលពីថ្ងៃប្រកួតបើកឆាក មុននឹងបន្តចាញ់ក្រុម Brendford ក្នុងលទ្ធផល ៤-០។
Man United មាន៣ពិន្ទុពីការប្រកួត៣លើក ដោយស្ថិតក្នុងចំណាត់ថ្នាក់លេខ១៤ លើតារាង ហើយពួកគេមិនស្គាល់ឈ្នះសោះពីការប្រកួតក្រៅដីផ្លូវការ៥លើកចុងក្រោយរបស់ពួកគេ។ Man United ធ្វើបានល្អប្រសើរជាងពីការជួបគ្នា៥លើកចុងក្រោយ ដោយឈ្នះ២លើក និងស្មើ៣លើក ហេតុនេះ ស្របពេលក្រុមភ្ញៀវមានកម្រិតមុតស្រួចឡើងវិញ ហើយទំនងដូចជារកឃើញពីភាពខ្លាំងរបស់ខ្លួន ជាការរំពឹងទុក Man United គួរតែបន្តធ្វើបានល្អពីការប្រកួតនេះ៕
ការព្យាករសម្រាប់ការប្រកួតនេះ៖ ក្រុម Man United នឹងឈ្នះក្នុងលទ្ធផល ២-០
