បរទេស៖ បើយោងទៅតាមការចេញផ្សាយនៅលើគេហទំព័រនាយកដ្ឋានពន្ធដាររបស់អេស្ប៉ាញ ខ្សែប្រយុទ្ធ Neymar របស់ក្លិប Paris Saint-Germain ជំពាក់ថ្លៃពន្ធដារដែលមិនទាន់បានបង់ច្រើនជាងបុគ្គលណាៗទាំងអស់នៅក្នុងបញ្ជីខ្មៅរបស់អាជ្ញាធពន្ធដារអេស្ប៉ាញ ក្រោយពីបានជំពាក់ក្នុងទឹកប្រាក់៣៤,៦លានផោន (ស្មើនឹង៤០,៥លានដុល្លារអាមេរិក)។
តារាឆ្នើមអន្តរជាតិប្រេស៊ីលរូបនេះ ដែលបានលេងឲ្យក្លិប Barcelona ចាប់ពីឆ្នាំ២០១៣ ដល់ឆ្នាំ២០១៧ នៅមុនពេលផ្ទេរទៅកាន់ក្លិបយក្សរបស់បារាំងក្នុងតម្លៃខ្លួន២២២លានអឺរ៉ូ ក្នុងការផ្ទេរដែលមានតម្លៃខ្លួនខ្ពស់ជាងគេបំផុតក្នុងប្រវត្តិសាស្ត្រនោះ ឈរលេខរៀងនាំមុខគេក្នុងចំណោមឈ្មោះអ្នកជំពាក់ពន្ធរាប់ពាន់នាក់នៅលើគេហទំព័ររបស់នាយកដ្ឋានពន្ធដារអេស្ប៉ាញ។
បណ្តាញសារព័ត៌មានអេស្ប៉ាញ បានចេញផ្សាយកាលពីឆ្នាំមុនថា អាជ្ញាធរពន្ធដាររបស់ប្រទេសនេះ បានប្តឹង Neymar ពីបទការបន្លំការបង់ពន្ធ ចាប់តាំងពីរូបគេចូលលេងឲ្យក្លិប Barcelona ប៉ុន្តែ នេះគឺជាលើកទី១ហើយដែលព័ត៌មាននេះត្រូវបានបញ្ចេញផ្សាយជាផ្លូវការ។ នាយកដ្ឋានពន្ធដារអេស្ប៉ាញ មិនបានបញ្ជាក់ថា វត្តមានបស់ Neymar នៅក្នុងបញ្ជីរបស់ខ្លួន បានជាប់ទាក់ទងនឹងការផ្ទេររបស់គេកាលពីឆ្នាំ២០១៣ទៅកាន់ក្លិប Barcelona ពីក្លិបពីប្រទេសប្រេស៊ីល Santos ឡើយ៕
ប្រភពព័ត៌មាន៖ AFP
