បរទេស៖ លោក Jurgen Klopp បានទទួលស្គាល់ថា លោកមានការភ្ញាក់ផ្អើលចំពោះការរងបរាជ័យដ៏មិននឹកស្មានដល់របស់ក្រុម Liverpool ក្នុងលទ្ធផល ៧-២ ក្រោមស្នាដៃក្រុម Aston Villa កាលពីថ្ងៃអាទិត្យ។ ខ្សែប្រយុទ្ធ Ollie Watkins បានស៊ុតបាល់បញ្ចូលទី៣គ្រាប់នៅត្រឹមតង់ទី១ ខណៈដែលក្រុមហង្សក្រហម បានក្លាយជាក្រុមម្ចាស់ការពារតំណែងជើងឯកដំបូងគេដែលរបូតគ្រាប់បាល់ចំនួន៧គ្រាប់ នៅក្នុងការប្រកួតក្របខ័ណ្ឌលីក បើគិតចាប់តាំងពីឆ្នាំ១៩៥៣។ លោក Klopp បានឲ្យដឹងថា៖ «នេះគឺជាលទ្ធផលដែលឥតរំពឹងទុក តែវាបានកើតឡើងនៅយប់នេះ។
យើងបានប្រព្រឹត្តកំហុសសព្វបែយ៉ាង នៅក្នុងការប្រកួតតែមួយ ហើយជាការរំពឹងទុក យើងអាចចាប់ផ្តើមម្តងទៀត»។ កំណត់ត្រាដ៏ល្អរបស់ក្រុម Liverpool ត្រូវបានកម្ទេចដោយសារតែភាពមុតស្រួចក្នុងតំបន់ប្រយុទ្ធរបស់ក្រុម Aston Villa បើទោះបីពួកគេបានអវត្តមានអ្នកចាំទីដៃស្អិត Alisson Becker ដោយសារតែបញ្ហារបួស និងតារាឆ្នើម Sadio Mane ដោយសារតែការតេស្តឃើញវីរុសកូរ៉ូណាក៏ដោយ។ ក្រុមហង្សក្រហម មិនធ្លាប់ចាញ់សោះបើគិតចាប់តាំងពីការប្រកួតលីកជុំទី២៨ កាលពីរដូវកាលមុន និងបានឈ្នះរាល់ការប្រកួតបើកឆាកទាំង៣លើក នៅរដូវកាលនេះ។
លោក Klopp បានបន្ថែមទៀតថា៖ «គ្រាប់បាល់ដំបូងបានផ្តល់ឥទ្ធិពលមួយ ប៉ុន្តែ គួរតែមិនដល់ថ្នាក់នេះទេ។ Adrian បានធ្វើឲ្យមានកំហុស ប៉ុន្តែ យើងបានរបូតគ្រាប់បាល់បែបនេះកាលពីមុន។ បន្ទាប់មក យើងបានភ្លេចទម្រង់លេងរបស់យើ»៕
ប្រភពព័ត៌មាន៖ Channel News Asia
