បរទេស៖ ក្លិប Roma បានបំពេញការផ្ទេរខ្សែការពារអន្តរជាតិអង់គ្លេស Chris Smalling សម្រាប់តម្លៃខ្លួន១៥លានអឺរ៉ូ (ស្មើនឹង១៧,៥លានដុល្លារអាមេរិក) ពីក្លិប Manchester United។
នេះបើយោងទៅតាមការប្រកាសរបស់ក្លិបអ៊ីតាលី មួយនេះ កាលពីថ្ងៃចន្ទ។ ក្នុងសេចក្តីថ្លែងការណ៍មួយ ក្លិប Roma បានបញ្ជាក់ថា កីឡាករវ័យ៣០ឆ្នាំរូបនេះ ដែលបានស៊ុតបាល់បញ្ចូលទី៣គ្រាប់ក្នុងការបង្ហាញខ្លួន៣៧លើកក្នុងរាល់យុទ្ធនាការទាំងអស់ក្នុងពេលលេងជាកីឡាករកម្ចីនៅក្លិបអ៊ីតាលីមួយនេះ កាលពីរដូវកាលមុន បានចុះហត្ថលេខាលើកុងត្រាមួយ ដែលនឹងធ្វើឲ្យរូបគេបន្តលេងនៅរដ្ឋធានីរបស់អ៊ីតាលីរហូតដល់ឆ្នាំ២០២៣។ Smalling បានសម្របខ្លួនយ៉ាងល្អនៅទីក្រុងរ៉ូម និងបានទទួលរហស្សនាមថា «Smalldini» ក្រោយពីបានបង្ហាញពីទម្រង់លេងយ៉ាងល្អនៅតំបន់ការពាររបស់ក្លិប Roman។ Smalling បានឲ្យដឹងថា៖ «គ្មានអ្វីដែលមានតម្លៃក្នុងជីវិតកើតឡើងដោយងាយស្រួលឡើយ។
ទឹកចិត្ត និងបេះដូងរបស់ខ្ញុំតែងតែស្ថិតនៅទីក្រុងរ៉ូមជានិច្ច។ ខ្ញុំពិតជារីករាយក្នុងការក្លាយជារបស់អ្នក»។ ការផ្ទេរនេះ ដែលត្រូវបានអូសបន្លាយពេលយូរនៅក្នុងពេលបើកទីផ្សារដោះដូរកីឡាករ ក៏បូករួមទាំងប្រាក់ឧបត្ថម្ភផ្សេងៗចំនួន៥លានអឺរ៉ូផងដែរ៕
ប្រភពព័ត៌មាន៖ Channel News Asia
