បរទេស៖ ការត្រៀមលក្ខខណៈរបស់ប្រទេសកាតាសម្រាប់ការធ្វើជាម្ចាស់ផ្ទះ World Cup ឆ្នាំ២០២២ បានវិវឌ្ឍដ៏គួរឲ្យកត់សម្គាល់ បើទោះបីការរាតត្បាតរបស់វីរុសកូរ៉ូណាក៏ដោយ។
នេះបើយោងទៅតាមការបញ្ជាក់របស់ប្រធាន FIFA លោក Gianni Infantino កាលពីថ្ងៃពុធ ខណៈដែលលោកបានបញ្ជាក់ថា លោកមិនមានអ្វីត្រូវរិះគន់ ក្រោយពីការទៅទស្សនកិច្ចនៅកីឡដ្ឋាន Al Bayt ឡើយ។ ក្នុងដំណើរទស្សនកិច្ចទៅកាន់ទីក្រុងដូហា ដែលអំឡុងពេលនោះ លោកបានទទួលឈុតសម្លៀកបំពាក់មួយសម្រាប់ ដើម្បីលេងការប្រកួតមួយដែលមានសមាជិក៧នាក់ក្នុងមួយក្រុមនៅកីឡដ្ឋាន Al Bayt លោក Infantino បាននិយាយថា លោកពិតជារីករាយណាស់ទៅនឹងវឌ្ឍនភាពរបស់កាតា នៅមុនពេល World Cup។ មុននឹងបន្ថែមថា កីឡដ្ឋានចំនួន៨នឹងសាងសង់រួចរាល់ជាស្ថាពរ នៅមុនពេលព្រឹត្តិការណ៍ចាប់ផ្តើមនោះ លោកបានឲ្យដឹងនៅក្នុងសេចក្តីថ្លែងការណ៍មួយថា៖ «យើងមានផែនការជាច្រើន ប៉ុន្តែ នៅពេលដែលអ្នកមើលឃើញជាក់ស្តែង វាពិតជាទាក់ទាញណាស់»។
លោកបានបន្ថែមទៀតថា៖ «កាតា អាចបន្តឆ្ពោះទៅមុខ អំឡុងពេលរយៈពេល៦ខែចុងក្រោយនេះ ស្របពេលដែលពិភពលោកនៅក្នុងស្ថានភាពជាប់គាំង ពោលគឺចាប់ពីហេដ្ឋារចនាសម្ព័ន្ធ រហូតដល់ការអភិវឌ្ឍសំខាន់ៗ ដូចជា កំណែទម្រង់ការងារនាពេលថ្មីៗនេះ ដែលត្រូវបានប្រកាសដោយរដ្ឋាភិបាល»៕
ប្រភពព័ត៌មាន៖ Sky Sports
