បរទេស៖ លោក Roberto Mancini កំពុងតែសោកស្តាយពីការរងបរាជ័យដ៏ឈឺចាប់បំផុតនៃអាជីពជាគ្រូបង្វឹករបស់លោក ក្រោយពីការរងបរាជ័យដ៏មិននឹកស្មានដល់នៅនាទីចុងក្រោយ ក្នុងលទ្ធផល ១-០ ក្រោមស្នាដៃក្រុមជម្រើសជាតិម៉ាសេដ្វានខាងជើង ធ្វើឲ្យពួកគេត្រូវអវត្តមានក្នុងព្រឹត្តិការណ៍ World Cup ជាលើកទី២ជាប់ៗគ្នា។
លោក Mancini បានក្លាយជាវីរបុរសរបស់ជាតិ ក្រោយពីបានដឹកនាំឲ្យក្រុមជម្រើសជាតិអុីតាលី រួចផុតពីសុបិនអាក្រក់នៃការខកខានក្នុងការឈ្នះកៅអីទៅលេង World Cup ឆ្នាំ២០១៨ និងឈ្នះពាន Euro ឆ្នាំ ២០២០។ ប៉ុន្តែ ទោះបីជាយ៉ាណា ទម្រង់លេងរបស់ពួកគេ បានធ្លាក់ចុះ ចាប់តាំងពីរាត្រីដ៏រីករាយនោះ ហើយក្រោយពីខ្ជះខ្ជាយឱកាសក្នុងការឈ្នះកៅអីជាស្វ័យប្រវត្តិ កាលពីខែវិច្ឆិកា អុីតាលី បានធ្លាក់ចេញយ៉ាងអាម៉ាសក្នុងទីក្រុង Palermo ក្នុងការប្រកួតវគ្គ Playoff ពាក់កណ្តាលផ្តាច់ព្រ័ត្រ។
លោក Mancini បានប្រាប់សារព័ត៌មាន RAI ថា៖ «ដោយសារតែខែកក្កដា គឺជាខែដែលមានរឿងរ៉ាវល្អបំផុតដែលកើតឡើងក្នុងអាជីពរបស់ខ្ញុំ នេះគឺជាការខកចិត្តដ៏ធំបំផុតរបស់ខ្ញុំ។ ខ្ញុំពិតជាសោកសៅជំនួសកីឡាកររបស់ខ្ញុំណាស់។ ការខកចិត្តពិតជាធំពេកហើយសម្រាប់ខ្ញុំដែលមិនអាចឲ្យខ្ញុំនិយាយពីអនាគតបានឡើយនៅពេលនេះ»៕
ប្រភពព័ត៌មាន៖ Channel News Asia
