បរទេស៖ ក្រុមបាល់ទាត់ជម្រើសជាតិអ៊ុយក្រែន ត្រូវការឈ្នះត្រឹមតែ១ប្រកួតទៀតប៉ុណ្ណោះ ដើម្បីឈ្នះកៅអីទៅប្រកួត World Cup ក្រោយពីបានផ្តួលក្រុមបាត់ជម្រើសជាតិស្កុតឡេន ក្នុងលទ្ធផល ៣-១ ក្នុងការប្រកួតវគ្គ Playoff ពាក់កណ្តាលផ្តាច់ព្រ័ត្រ ក្នុងទីក្រុង Glasgow កាលពីថ្ងៃពុធ ក្នុងការប្រកួតផ្លូវការជាលើកដំបូងរបស់ពួកគេ បើគិតចាប់តាំងពីប្រទេសនេះ ត្រូវបានឈ្លានពានដោយរុស្ស៊ី។
កីឡាករ Andriy Yarmolenko, Roman Yaremchuk និង Artem Dovbyk សុទ្ធសឹងបានស៊ុតបាល់បញ្ចូលទីដូចគ្នាសម្រាប់ក្រុមអ៊ុយក្រែន ដើម្បីឈានទៅជួបជាមួយនឹងក្រុមជម្រើសជាតិវេលស៍ ក្នុងវគ្គផ្តាច់ព្រ័ត្រ នៅថ្ងៃអាទិត្យ ដើម្បីប្រជែងយកកៅអីទៅកាន់ប្រទេសកាតា នៅចុងឆ្នាំនេះ។ ការប្រកួតនេះ ត្រូវបានពន្យារពេលតាំងពីខែមីនា ពោលគឺត្រឹមតែប៉ុន្មានសប្តាហ៍ ក្រោយពីសង្គ្រាមបានចាប់ផ្តើម ដើម្បីផ្តល់ឱកាសឲ្យអ៊ុយក្រែន បំពេញការប្រកួតរបស់ខ្លួន។ កីឡាករ៦នាក់ក្នុងចំណោមកីឡាករទាំង១១នាក់ដំបូង របស់ក្រុមភ្ញៀវ នៅតែជាប់កិច្ចសន្យាជាមួយនឹងក្លិបរបស់អ៊ុយក្រែននៅឡើយ និងមិនធ្លាប់បានលេងក្នុងការប្រកួតផ្លូវការទាល់តែសោះ អស់រយៈពេលជាច្រើនខែមកហើយ។
ខ្សែការពារ Oleksandr Zinchenko របស់ក្លិប Manchester City បានស្រក់ទឹកភ្នែក នៅល្ងាចថ្ងៃមុនការប្រកួតមកដល់ នៅពេលដែលរូបគេបានរៀបរាប់ថា វាមានន័យបែបណា ក្នុងការជួយឲ្យអ៊ុយក្រែន ឈ្នះកៅអីទៅ World Cup។ ប៉ុន្តែ ពួកគេមិនបានបង្ហាញពីសញ្ញានៃការអន់ថយ ឬក៏ធ្វើឲ្យការរំពឹងទុករបស់ប្រទេសខ្លួន ខកចិត្តឡើយ៕
ប្រភពព័ត៌មាន៖ Channel News Asia