បរទេស៖ លោក Joachim Loew គ្រូបង្វឹកនៃក្រុមបាល់ទាត់ជម្រើសជាតិអាល្លឺម៉ង់ បានទទួលស្គាល់ថា ក្រុមរបស់លោកមានបញ្ហាទៅលើភាពជាអ្នកដឹកនាំ ដើម្បីលេងឲ្យបានល្អ ក្រោយពីបានទទួលលទ្ធផលស្មើ៣លើកជាប់ៗគ្នា ស្របពេលដែលបញ្ហាក្នុងក្រុមនៅតែបន្ត មុននឹងឈានទៅកាន់ការប្រកួត២លើកជាប់ៗគ្នាក្នុងយុទ្ធនាការ Nations League។
ខ្សែប្រយុទ្ធអន្តរជាតិតួកគី Kenan Karaman បានរកគ្រាប់បាល់តាមស្មើនៅនាទី ទី៩៤ សម្រាប់ក្រុមរបស់ខ្លួនក្នុងការប្រកួតនៅទីក្រុង Cologne ដើម្បីបញ្ចប់ក្នុងលទ្ធផលស្មើ ៣-៣ នៅក្នុងការប្រកួតមិត្តភាពកាលពីថ្ងៃពុធ ខណៈដែលក្រុមប្រជុំដោយកីឡាករគ្មានបទពិសោធរបស់អាល្លឺម៉ង់ បានខ្ជះខ្ជាយការគ្រាប់បាល់នាំមុខចំនួន៣លើក។
ក្រុមជម្រើសជាតិអាល្លឺម៉ង់ កំពុងតែបង្កើតទម្លាប់មួយនៃការរបូតគ្រាប់បាល់តាមស្មើ ក្រោយពីបានបញ្ចប់ក្នុងលទ្ធផលស្មើ ១-១ ចំនួន២លើក កាលពីខែមុន នៅពេលប្រកួតជាមួយនឹងក្រុមជម្រើសជាតិអេស្ប៉ាញ និងស្វ៊ីស ក្នុងការប្រកួតបើកឆាកទាំង២លើករបស់ពួកគេក្នុងយុទ្ធនាការ Nations League។ សម្រាប់ការប្រកួតបន្ទាប់ អាល្លឺម៉ង់ នឹងត្រូវធ្វើដំណើរទៅកាន់ទីក្រុងគៀវដើម្បីជួបជាមួយនឹងក្រុមជម្រើសជាតិអ៊ុយក្រែន ដែលកំពុងញាំញីដោយរបួស និងបញ្ហាឆ្លងកូវីដ-១៩៕
ប្រភពព័ត៌មាន៖ Channel News Asia
