បរទេស៖ ក្រុមបាល់ទាត់ជម្រើសជាតិអាល្លឺម៉ង់ នឹងធ្វើជាម្ចាស់ផ្ទះទទួលក្រុមជម្រើសជាតិស្វ៊ីស ស្របពេលដែលលោក Joachim Loew គ្រូបង្វឹកនៃក្រុមជម្រើសជាតិអាល្លឺម៉ង់ កំពុងតែរងនូវការរិះគន់នានា ខណៈដែលលោកនៅតែជួបភាពត្រដាបត្រដួសក្នុងការស្រោចស្រង់ក្រុមបន្ទាប់ពីការជួបយុទ្ធនាការ World Cup យ៉ាងខកចិត្តក្នុងឆ្នាំ២០១៨។
បើទោះបីក្រុមជម្រើសជាតិអាល្លឺម៉ង់ ហាក់បានវិលទៅរកភាពខ្លាំងវិញក៏ដោយ ប៉ុន្តែ ពួកគេមិនបានជួបលទ្ធផលល្អប្រសើរក្នុងយុទ្ធនាការ Nations League ឡើយ ក្រោយពីបានបញ្ចប់ក្នុងលទ្ធផលស្មើ២លើក នៅពេលប៉ះក្រុមជម្រើសជាតិអេស្ប៉ាញ និងស្វ៊ីស និងបានយកឈ្នះទាំងប្រផិតប្រផើយលើក្រុមជម្រើសជាតិអ៊ុយក្រែន មុននឹងត្រូវប៉ះជាមួយនឹងក្រុមជម្រើសជាតិស្វ៊ីស ក្នុងទីក្រុង Cologne។ ក្រុមប្រជុំដោយតារាឆ្នើមៗរបស់អាល្លឺម៉ង់ បានកត់ត្រាជ័យជម្នះក្នុងលទ្ធផល ២-១ លើក្រុមជម្រើសជាតិអ៊ុយក្រែន ក្នុងទីក្រុងគៀវ កាលពីថ្ងៃសៅរ៍ ក្រោយពីបានបញ្ចប់ក្នុងលទ្ធផលស្មើ៣លើកជាប់ៗគ្នា នៅពេលដែលក្រុមអាល្លឺម៉ង់ បានរបូតគ្រាប់បាល់ទាំង៣គ្រាប់នៅក្នុងតង់ទី២។
នៅថ្ងៃអង្គារនេះ កីឡាករ Toni Kroos នឹងបង្ហាញខ្លួនជាលើកទី១០០របស់គេសម្រាប់ក្រុមអាល្លឺម៉ង់ ប៉ុន្តែ Julian Draxler, Marcel Halstenberg និង Lukas Klostermann សុទ្ធសឹងមានបញ្ហារបួស និងស្ថិតក្នុងភាពមិនច្បាស់ក្នុងការលេងក្នុងជម្រើសដំបូង។ បើទោះបីមានបញ្ហារបួស និងមានសញ្ញាដ៏គួរឲ្យព្រួយបារម្ភក្នុងទីក្រុងគៀវក៏ដោយ ប៉ុន្តែ លោក Loew គិតថា មានការផ្លាស់ប្តូរតិចតួចប៉ុណ្ណោះក្នុងក្រុមជម្រើសទាំង១១នាក់ដំបូរបស់លោក។ ស្របពេលដែលយុទ្ធនាការ Euro ឆ្នាំ២០២០ នៅសល់រយៈពេល៨ខែទៀត លោក Loew បានបញ្ជាក់ថា៖ «ខ្ញុំមើលឃើញពីរូបភាពដ៏ធំមួយ ក្នុងដំណើរឆ្ពោះទៅកាន់ Euro»៕
ប្រភពព័ត៌មាន៖ Channel News Asia
