បរទេស៖ លោក Joachim Loew ត្រូវតែដោះស្រាយវិបត្តិក្នុងតំបន់ការពាររបស់ក្រុមបាល់ទាត់ជម្រើសជាតិអាល្លឺម៉ង់ សម្រាប់ការប្រកួត៣លើកចុងក្រោយនៅឆ្នាំ២០២០នេះ ប៉ុន្តែ ខ្សែការពារពោរពេញដោយបទពិសោធ Mats Hummels និង Jerome Boateng នៅតែស្ថិតនៅក្រៅជម្រើស។
ក្រុមបាល់ទាត់ជម្រើសជាតិអាល្លឺម៉ង់ នឹងធ្វើជាម្ចាស់ផ្ទះទទួលក្រុមជម្រើសជាតិសាធារណរដ្ឋឆែក នៅក្នុងទីក្រុង Leipzig នៅរាត្រីនេះ នៅមុនពេលការប្រកួតដណ្តើមពាន Nations League លើទឹកដីខ្លួនឯងជាមួយនឹងក្រុមជម្រើសជាតិអ៊ុយក្រែន នៅថ្ងៃសៅរ៍ មុននឹងធ្វើដំណើរទៅជួបក្រុមជម្រើសជាតិអេស្ប៉ាញ នៅថ្ងៃអង្គារសប្តាហ៍ក្រោយ។ ក្រុមជម្រើសជាតិស្វ៊ីស បានធ្វើឲ្យក្រុមជម្រើសជាតិអាល្លឺម៉ង់ បញ្ចប់ក្នុងលទ្ធផលស្មើ ៣-៣ ក្នុងទីក្រុង Cologne កាលពីពាក់កណ្តាលខែតុលា ពោលគឺត្រឹមតែរយៈពេល៦ថ្ងៃ ក្រោយពីក្រុមជម្រើសជាតិតួកគី ក៏បានធ្វើឲ្យក្រុមជម្រើសជាតិអាល្លឺម៉ង់ ទទួលបានលទ្ធផលស្មើ ៣-៣ ក្នុងការប្រកួតមិត្តភាពផងដែរ។ ក្នុងរាល់ការប្រកួតទាំងអស់ អាល្លឺម៉ង់ បានបរបូតគ្រាប់បាល់៩គ្រាប់ក្នុងការប្រកួត៥លើកចុងក្រោយ។
ដោយមិនធ្វើការកោះហៅ Boateng និង Hummels លោក Loew បានបញ្ជាក់កាលពីថ្ងៃអង្គារថា ខ្សែការពារ Antonio Ruediger របស់ក្លិប Chelsea និង Robin Koch ដែលក៏លេងឲ្យក្របខ័ណ្ឌ Premier League សម្រាប់ក្លិប Leeds United នោះ នឹងចាប់ដៃគូគ្នានៅតំបន់ការពារកណ្តាល ពេលប៉ះជាមួយនឹងក្រុមជម្រើសជាតិឆែក។ ជាមួយគ្នានេះ កីឡាករ Niklas Suele ដែលជាជម្រើសដ៏ទៀងទាត់របស់លោក Loew នៅតំបន់ការពារ នឹងត្រូវអវត្តមានដោយសារតែឆ្លងវីរុសកូរ៉ូណា៕
ប្រភពព័ត៌មាន៖ Channel News Asia
