បរទេស៖ ខ្សែបម្រើប្រយុទ្ធ Kai Havertz និងខ្សែប្រយុទ្ធ Timo Werner សុទ្ធសឹងបានស៊ុតបាល់បញ្ចូលទីលើដៃគូដូចគ្នា ក្នុងពេលក្រុមជម្រើសជាតិអាល្លឺម៉ង់ បានបញ្ចប់ក្នុងលទ្ធផលស្មើ ៣-៣ ជាមួយនឹងក្រុមជម្រើសជាតិស្វ៊ីស ក្នុងការប្រកួត Nations League កាលពីថ្ងៃអង្គារ។
ប៉ុន្តែ លទ្ធផលស្មើនេះ កាន់តែធ្វើឲ្យលោក Joachim Loew កាន់តែធ្លាក់ចូលក្នុងសម្ពាធបន្ថែមទៀត ខណៈដែលក្រុមរបស់លោកបានបញ្ចប់ក្នុងលទ្ធផលស្មើដល់ទៅ៤លើកក្នុងចំណោមការប្រកួត៥លើកចុងក្រោយរបស់ពួកគេ។ ពួកគេបានហកឈ្នះលើក្រុមជម្រើសជាតិអ៊ុយក្រែន ក្នុងលទ្ធផល ២-១ ជាមួយនឹងក្រុមប្រជុំដោយតារាឆ្នើមៗរបស់ខ្លួននៅក្នុងទីក្រុងគៀវកាលពីថ្ងៃសៅរ៍ ហើយក្រោយពីការបញ្ចប់ក្នុងលទ្ធផលស្មើ ៣-៣ លើទឹកដីខ្លួនឯងពេលប៉ះក្រុមជម្រើសជាតិតួកគី កាលពីថ្ងៃពុធ សប្តាហ៍មុន ក្រុមរបស់លោក Loew បានបង្ហាញពីភាពទន់ខ្សោយក្នុងតំបន់ការពារម្តងទៀត។
គ្រូបង្វឹកវ័យ៦០ឆ្នាំរូបនេះ ជាប់កិច្ចសន្យាជាមួយនឹងសហព័ន្ធកីឡាបាល់ទាត់អាល្លឺម៉ង់ រហូតដល់ World Cup ឆ្នាំ២០២២។ ទោះបីជាយ៉ាងណា ប្រជាប្រិយភាពរបស់លោកជាមួយនឹងក្រុមអ្នកគាំទ្រអាល្លឺម៉ង់ បានធ្លាក់ចុះ ក្រោយពីកើនឡើងខ្ពស់ តាមរយៈដឹកនាំឲ្យក្រុមឈ្នះពាន World Cup ឆ្នាំ២០១៤៕
ប្រភពព័ត៌មាន៖ BBC
