បរទេស៖ ខ្សែប្រយុទ្ធ Cristiano Ronaldo អាចនឹងប្រព្រឹត្តល្មើសនឹងវិធានការនានាទៅលើវីរុសកូរ៉ូណា តាមរយៈការវិលទៅកាន់ទីក្រុង Turin ពីប្រទេសព័រទុយហ្គាល់ ក្រោយពីតេស្តឃើញជាវិជ្ជមាន។
នេះបើយោងទៅតាមការបញ្ជាក់របស់លោក Vincenzo Spadafora រដ្ឋមន្ត្រីកីឡារបស់ប្រទេសអ៊ីតាលី កាលពីថ្ងៃព្រហស្បតិ៍។ នៅពេលដែលត្រូវបានចោទសួរថា ការវិលត្រឡប់របស់តារាឆ្នើមវ័យ៣៥ឆ្នាំរូបនេះ បានប្រព្រឹត្តល្មើសនឹងវិធានស្តីពីវីរុសកូវីដ-១៩ ឬយ៉ាងណា លោក Spadafora បានប្រាប់វិទ្យុ Radio Uno ថា៖ «ពិតណាស់ ខ្ញុំគិតអ៊ីចឹងដែរ ប្រសិនបើគ្មានការអនុញ្ញាតជាក់លាក់ពីអាជ្ញាធរសុខាភិបាលទេនោះ»។ Ronaldo បានចាកចេញពីក្រុមជម្រើសជាតិព័រទុយហ្គាល់ ក្បែរទីក្រុង Lisbon កាលពីថ្ងៃពុធ ដើម្បីធ្វើដំណើរវិលទៅកាន់ភាគខាងជើងនៃប្រទេសអ៊ីតាលីវិញ តាមរយៈយន្តហោះឯកជនរបស់គេ។ ក្លិប Juventus បានបញ្ជាក់ថា៖ «Cristiano Ronaldo បានវិលទៅកាន់ប្រទេសអ៊ីតាលីវិញជាមួយនឹងយន្តហោះសុខាភិបាល ដែលត្រូវបានអនុញ្ញាតដោយអាជ្ញាធរសុខាភិបាលមានសមត្ថកិច្ច ទៅតាមការស្នើសុំរបស់កីឡាកររូបនេះ ហើយនិងបន្តនៅដាច់ដោយឡែកពីគេក្នុងផ្ទះរបស់គេ»។
ម្ចាស់ពានបាល់មាស Ballon d’Or ៥សម័យកាលរូបនេះ មិនចេញរោគសញ្ញាអ្វីឡើយ ក្រោយពីតេស្តឃើញជាវិជ្ជមាន កាលពីថ្ងៃចន្ទ ពោលគឺ១ថ្ងៃ ក្រោយពីក្រុមជម្រើសជាតិព័រទុយហ្គាល់ បានបញ្ចប់ក្នុងលទ្ធផលស្មើ ០-០ នៅទីក្រុងប៉ារីស៕
ប្រភពព័ត៌មាន៖ Channel News Asia
