បរទេស៖ វីរបុរសក្លឹបបិសាចក្រហម Man Utd ខ្សែប្រយុទ្ធចាស់វស្សា Wayne Rooney បានក្លាយជាបេក្ខជនអាទិភាពដើម្បីទទួលយកតំណែងជាអ្នកចាត់ការទូទៅលើកដំបូងក្នុងអាជីពជាមួយក្លឹប Derby County ខណៈគ្រូបង្វឹកសញ្ជាតិហូឡង់បច្ចុប្បន្នលោក Phillip Cocu ប្រឈមនឹងការបញ្ចប់តួនាទីក្រោយពីដឹកនាំក្រុមមិនទទួលបានលទ្ធផលល្អដូចការរំពឺងទុកនៅរដូវកាលថ្មី២០២០-២០២១។
ប្រភពពីគេហទំព័រ The Sun បានចុះផ្សាយថា៖ “ក្លឹបក៏មានបំណងចង់បានអតីតគ្រូបង្វឹកលោក John Gregory ដើម្បីមករួមការងារជាមួយនិង Rooney ក្នុងពេលខាងមុខនេះ”។ ក្លឹបនៅក្របខណ្ឌលីកទីពីរអង់គ្លេស (Championship) បានចាប់ផ្តើមរដូវកាលថ្មីមិនបានល្អទេ ដោយចាញ់បីប្រកួតដំបូងនិងឈ្នះតែ១ប្រកួតចុងក្រោយជាមួយ Norwich ប៉ុណ្ណោះដោយការទាត់បាល់ពិន័យ Free Kick នៅនាទីចុងក្រោយដែលបានជួយស្រោចស្រង់តំណែងលោក Cocu នាពេលនោះ។
ផ្ទុយទៅវិញ Rooney បានក្លាយជាប្រធានបទដែលត្រូវលើកយកមកពិភាក្សាពីសំណាក់គណៈគ្រប់គ្រងក្លឹបឡើងឋានៈទោះបីជាអតីតខ្សែប្រយុទ្ធក្លឹបបិសាចក្រហមវ័យ៣៤ឆ្នាំមិនមានបទពិសោធន៍ធ្លាប់ដឹកនាំក្លឹបតែគុណសម្បត្តិក្នុងនាមកីឡាករ និង ដើរតួនាទីជាគ្រូបង្វឹកកីឡាករចាប់តាំងពីខែវិច្ឆិកា២០១៩ក្រោយផ្ទេរពី D.C United នៅក្របខណ្ឌ Major League Soccer មក៕
ប្រភពព័ត៍មាន៖ Metro
