បរទេស៖ ការការពារពានក្របខ័ណ្ឌ Premier League របស់ក្រុម Liverpool បានធ្លាក់ក្នុងភាពរង្គោះរង្គើ កាលពីថ្ងៃអាទិត្យ នៅពេលដែលក្លិបនេះ បានប្រកាសថា ខ្សែការពារដ៏ឆ្នើម Virgil van Dijk បានរងរបួសដាច់សរសៃជង្គង់ ស្របពេលដែលមានព័ត៌មានចេញផ្សាយថា ខ្សែការពារអន្តរជាតិហូឡង់រូបនេះ អាចនឹងអវត្តមានរហូតបញ្ចប់រដូវកាលនេះ។
Van Dijk ដែលនឹងត្រូវទទួលការវះកាត់ បានរងរបួស ក្រោយពីការប្រជែងដណ្តើមបាល់ដ៏គ្រោះថ្នាក់ពីអ្នកចាំទី Jordan Pickford របស់ក្លិប Everton ក្នុងពេលពួកគេបានបញ្ចប់ក្នុងលទ្ធផលស្មើ ២-២ ក្នុងការប្រកួតរវាងក្រុមស្ថិតក្នុងតំបន់ Merseyside ដូចគ្នា កាលពីថ្ងៃសៅរ៍។ Liverpool បានឲ្យដឹងក្នុងសេចក្តីថ្លែងការណ៍មួយថា៖ «ខ្សែការពារកណ្តាលរូបនេះ បានដាច់សរសៃជង្គង់ ក្រោយពីការប៉ះទង្គិចជាមួយនឹងអ្នកចាំទី Jordan Pickford ក្រោយពីលេងបានរយៈពេល៦នាទីនៅកីឡដ្ឋាន GoodisonPark។ Van Dijk ត្រូវបានប្តូរចេញ និងការត្រួតពិនិត្យបន្ថែមទៀត នៅលើរបួសរបស់គេ បានបង្ហាញថា រូបគេនឹងត្រូវតែទទួលការវះកាត់។
មិនមានពេលវេលាជាក់លាក់ទៅលើការវិលចូលលេងរបស់គេក្នុងដំណាក់កាលនេះឡើយ»។ ប៉ុន្តែ ការអវត្តមានរបស់គេនឹងមានរយៈពេលជាច្រើនខែ នៅមុនពេលរូបគេអាចវិលចូលលេងឲ្យ Liverpool ហេតុនេះ លោក Jurgen Klopp នឹងមានបញ្ហាដ៏ចម្បងក្នុងការដោះស្រាយក្នុងតំបន់ការពារនៅរដូវកាលនេះ៕
ប្រភពព័ត៌មាន៖ Channel News Asia
