បរទេស៖ លោក Pep Guardiola បានទទួលស្គាល់កាលពីថ្ងៃអង្គារថា លោកនៅតែមានអារម្មណ៍ថា ជាអ្នកទទួលខុសត្រូវចំពោះការធ្លាក់ចេញយ៉ាងខកចិត្តរបស់ក្រុម Manchester City ពីក្របខ័ណ្ឌ Champions League កាលពីរដូវកាលមុន តាមរយៈការបញ្ជាក់ថា ក្រុមរបស់លោក «ត្រូវតែលុបចោលកំហុសទាំងនេះ» ខណៈដែលពួកគេសម្លឹងរកការឈ្នះពានទ្វីបអឺរ៉ុប។
Man City ដែលនឹងធ្វើជាម្ចាស់ផ្ទះទទួលក្រុម Porto ក្នុងការប្រកួតបើកឆាករបស់ពួកគេនៅរាត្រីនេះ មិនធ្លាប់បានឆ្លងផុតវគ្គពាក់កណ្តាលផ្តាច់ព្រ័ត្រទាល់តែសោះក្នុងយុទ្ធនាការនេះ បើទោះបីបានទទួលជ័យជម្នះក្នុងការប្រកួតលីកក្នុងស្រុក ក្នុងរយៈពេលប៉ុន្មានឆ្នាំចុងក្រោយក៏ដោយ។ ការចងចាំដ៏ឈឺចាប់អំពីការធ្លាក់ចេញត្រឹមវគ្គ៨ក្រុមចុងក្រោយ ក្រោមស្នាដៃក្រុម Lyon កាលពីខែសីហា នៅតែស្ថិតក្នុងអារម្មណ៍របស់លោក Guardiola ដែលបានឈ្នះពានក្នុងយុទ្ធនាការ Champions League ជាលើកទី២ ក្នុងនាមជាគ្រូបង្វឹករបស់ក្លិប Barcelona កាលពីឆ្នាំ២០១១ ប៉ុន្តែ ចាប់តាំងពីពេលនោះមកលោកមិនធ្លាប់បានលើកពានននេះឡើយ។
គ្រូបង្វឹកសញ្ជាតិអេស្ប៉ាញរូបនេះបានឲ្យដឹងថា៖ «កាលនោះគឺជាពេលវេលាដ៏លំបាកមួយ។ ខ្ញុំមានអារម្មណ៍ថា ជាអ្នកទទួលខុសត្រូវទៅលើខកចិត្តរបស់ក្លិប និងកីឡាករ។ ខ្ញុំមិនអាចដឹកនាំក្លិបនេះឲ្យបានល្អ ហើយខ្ញុំជាអ្នកទទួលខុសត្រូវ»៕
ប្រភពព័ត៌មាន៖ Channel News Asia