បរទេស៖ លោក Jurgen Klopp អ្នកចាត់ការទូទៅរបស់ Liverpool បានធ្វើការប្រៀបធៀបការញ្ចប់ក្នុងលទ្ធផលស្មើ ២-២ ដ៏រំភើបរបស់ក្រុមលោកជាមួយនឹងក្រុម Manchester City កាលពីថ្ងៃអាទិត្យ នឹងការប្រកួតគ្នាយ៉ាងស្វិតស្វាញរវាងកីឡាករប្រដាល់ដណ្តើមរង្វាន់២នាក់ ដោយបញ្ជាក់ថា គ្មានក្រុមណាអាចធ្វេសប្រហែសបានឡើយ សូម្បីតែ១វិនាទី។
ខ្សែបម្រើប្រយុទ្ធដ៏មានឥទ្ធិពល Kevin De Bruyne បានជួយឲ្យក្រុមម្ចាស់ការពារជើងឯក Man City រកបានគ្រាប់បាល់នាំមុខមុននាកីឡដ្ឋាន Etihad ប៉ុន្តែ កីឡាករ Diogo Jota បានរកគ្រាប់បាល់តាមស្មើវិញក្នុងរយៈពេល៨នាទីមកក្រោយ សម្រាប់ក្រុមឈរលេខ២ Liverpool។ ខ្សែប្រយុទ្ធ Gabriel Jesus បានរក្សាគ្រាប់បាល់នាំមុខវិញសម្រាប់ក្រុម Man City នៅមុនពេលសម្រាកតង់ទី១ ប៉ុន្តែ Sadio Mane បានអបអរថ្ងៃខួបកំណើតអាយុ៣០ឆ្នាំរបស់គេ ជាមួយនឹងការរកគ្រាប់បាល់តាមស្មើជាលើកទី២សម្រាប់ក្រុមរបស់លោក Klopp។ Raheem Sterling ប្រហែលជាបានគិតថា រូបគេបានជួយឲ្យក្រុម Man City រកបានគ្រាប់បាល់នាំមុខជាលើកទី៣ពេលប្រកួតជាមួយនឹងអតីតក្រុមរបស់គេហើយ ប៉ុន្តែ វីដេអូជំនួយអាជ្ញាកណ្តាល (VAR) បានសម្រេចថា បាល់នោះគឺជាបាល់ Offside ហើយកីឡាករបម្រុង Riyad Mahrez ក៏មានឱកាសស៊ុតបាល់រំលងរបារទីផងដែរ។
MANCHESTER, ENGLAND – APRIL 10: Kevin De Bruyne of Manchester City is challenged by Virgil van Dijk of Liverpool during the Premier League match between Manchester City and Liverpool at Etihad Stadium on April 10, 2022 in Manchester, England. (Photo by Michael Regan/Getty Images)
លទ្ធផលនេះ បានបញ្ចប់ការឈ្នះជាប់ៗគ្នារបស់ Liverpool ត្រឹម១០ប្រកួត និងធ្វើឲ្យ Man City រក្សាការនាំមុខ១ពិន្ទុដដែល ខណៈដែលនៅសល់ការប្រកួត៨លើកទៀត។ លោក Klopp បានប្រាប់សារព័ត៌មាន Sky Sports ថា៖ «នេះពិតជាការប្រកួតដ៏អស្ចារ្យ។ ការប្រកួតដ៏ស្វិតស្វាញ ហើយ Man City បានចាប់ផ្តើមយ៉ាងល្អ ប៉ុន្តែ អ្នកអាចចាត់ទុកថា ដូចជាការប្រកួតប្រដាល់អ៊ីចឹង។ បើអ្នកទម្លាក់ដៃទាំង២ចុះក្រោមត្រឹមតែ១វិនាទី នោះអ្នកនឹងរងនូវការវាយឲ្យសន្លប់ធំមិនខាន»៕
ប្រភពព័ត៌មាន៖ Channel News Asia
