លោក Zidane អំពាវនាវឲ្យស្ងប់ចិត្ត ក្រោយ Real ចាញ់ក្រោមស្នាដៃក្រុម Shakhtar Donetsk (មានវីដេអូ)
បរទេស៖ លោក Zinedine Zidane បានអំពាវនាវឲ្យស្ងប់ចិត្ត ក្រោយពីក្រុម Real Madrid បានរងបរាជ័យក្នុងលទ្ធផល ៣-០ ក្រោមស្នាដៃក្រុម Shakhtar Donetsk ក្នុងការប្រកួតក្របខ័ណ្ឌ Champions League លើទឹកដីខ្លួនឯងកាលពីថ្ងៃពុធ ខណៈដែលនេះគឺជាការរងបរាជ័យជាលើកទី២ជាប់ៗគ្នារបស់ពួកគេ នៅមុនពេលការប្រកួត Clasico ជាមួយនឹងក្រុម Barcelona នៅថ្ងៃសៅរ៍ សប្តាហ៍នេះ។
ក្រុមម្ចាស់ជើងឯកអ៊ុយក្រែន Shakhtar បានអវត្តមានតារាឆ្នើមៗក្នុងជម្រើសដំបូងចំនួន១០នាក់ និងបុគ្គលិកក្លិប៩នាក់ ដោយសារតែការឆ្លងវីរុសកូរ៉ូណា ប៉ុន្តែ បានកត់ត្រាជ័យជម្នះដ៏គួរឲ្យចាប់អារម្មណ៍ នៅកីឡដ្ឋាន Alfredo di Stefano ក្រោយពីបានស៊ុតបាល់បញ្ចូលទី៣គ្រាប់ ក្នុងចន្លោះពេលត្រឹមតែ១៣នាទីនៅតង់ទី១។ លោក Zidane បានឲ្យដឹងថា៖ «យើងខ្វះខាតគ្រប់ចំណុចទាំងអស់ ប៉ុន្តែ ចំណុចដែលសំខាន់នោះគឺការជឿជាក់របស់យើង។ អ្វីដែលសំខាន់សម្រាប់យើងនៅពេលនេះ គឺការរក្សាចិត្តឲ្យស្ងប់។ នេះគឺជារាត្រីដ៏ខកចិត្តមួយ ហើយយើងត្រូវតែធ្វើឲ្យអ្វីៗមានភាពល្អប្រសើរឡើង»។
គ្រាប់បាល់ស៊ុតបញ្ចូលទីពីសំណាក់កីឡាករ Tete និង Manor Solomon នៅចន្លោះការធ្វើឲ្យបាល់ចូលទីខ្លួនឯងរបស់ Raphael Varane បានជួយឲ្យក្រុម Shakhtar នាំមុខដ៏រឹងមាំនៅត្រឹមតង់ទី១ ស្របពេលដែល Luka Modric និង Vinicius Junior បានវាយបក២គ្រាប់វិញសម្រាប់ក្រុមម្ចាស់ផ្ទះ៕
ប្រភពព័ត៌មាន៖ Channel News Asia