បរទេស៖ តារាឆ្នើម Eden Hazard បានធ្វើដំណើរជាមួយនឹងក្រុម Real Madrid ទៅកាន់ទឹកដីអាល្លឺម៉ង់ និងអាចចូលលេង ក្រោយពីរបួស នៅពេលប៉ះជាមួយនឹងក្រុម Borussia Moenchengladbach នៅក្នុងក្របខ័ណ្ឌ Champions League។
នេះបើយោងទៅតាមការបញ្ជាក់របស់លោកគ្រូបង្វឹក Zinedine Zidane កាលពីថ្ងៃចន្ទ។ ខណៈដែលកំពុងតែផ្តោតទៅលើការប្រកួត Champions League នៅរាត្រីនេះ លោក Zidane បានឲ្យដឹងថា៖ «នេះគឺជាដំណឹងល្អ។ យើងទាំងអស់គ្នារីករាយដែលរូបគេស្ថិតនៅជាមួយនឹងយើង ហើយយើងនឹងរង់ចាំមើលពីរបៀបដែលយើងនឹងប្រើប្រាស់រូបគេនៅថ្ងៃស្អែក។ រឿងដ៏សំខាន់នោះគឺថា រូបគេវិលមកវិញ ហើយនោះគឺជាចំណុចវិជ្ជមានសម្រាប់យើង»។ ការបង្ហាញខ្លួនជាលើកចុងក្រោយរបស់ Hazard បានកើតឡើងក្នុងក្របខ័ណ្ឌ Champions League ក្នុងពេលក្រុមខ្លួនបានរងបរាជ័យក្នុងការប្រកួតវគ្គ១៦ក្រុមចុងក្រោយ ជើងទី២ ក្រោមស្នាដៃក្រុម Manchester City កាលពីថ្ងៃទី១៧ ខែសីហា នៅចុងរដូវកាលទី១របស់គេនៅក្នុងទីក្រុងម៉ាឌ្រីដ ដែលត្រូវបានរំខានដោយបញ្ហារបួស។
ខ្សែប្រយុទ្ធអន្តរជាតិបែលហ្ស៊ិកវ័យ២៩ឆ្នាំរូបនេះ បានប្តូរចេញនៅនាទី ទី៨៣ នៅក្នុងទីក្រុង Manchester និងមិនធ្លាប់បានចូលលេងសោះចាប់តាំងពីពេលនោះ ដោយសារតែបញ្ហារបួសភ្លៅស្តាំរបស់គេ។ ក្រុម Real បានរងបរាជ័យក្នុងការប្រកួតបើកឆាកនៃ Champions League ក្នុងលទ្ធផល ៣-២ លើទឹកដីខ្លួនឯងក្រោមស្នាដៃក្រុម Shakhtar Donetsk កាលពីថ្ងៃពុធ សប្តាហ៍មុន។ ពួកគេបានស្តារមុខមាត់វិញ តាមរយៈការយកឈ្នះលើក្រុម Barcelona ៣-១ ក្នុងក្របខ័ណ្ឌ La Liga កាលពីថ្ងៃសៅរ៍៕
ប្រភពព័ត៌មាន៖ Channel News Asia
