បរទេស៖ លោក Jurgen Klopp អ្នកចាត់ការទូទៅរបស់ក្រុម Liverpool បានកោតសរសើរទៅលើទម្រង់លេងរបស់ក្រុមខ្លួន ក្នុងពេលអវត្តមានខ្សែការពារឆ្នើម Virgil van Dijk ខណៈដែលពួកគេត្រៀមធ្វើជាម្ចាស់ផ្ទះទទួលក្រុម Midtjylland ក្នុងការប្រកួតក្របខ័ណ្ឌ Champions League វគ្គចែកពូល នៅរាត្រីនេះ។
Liverpool បានយកឈ្នះលើក្រុម Ajax Amsterdam ក្នុងលទ្ធផល ១-០ ពីការប្រកួតបើកឆាកក្នុងពូលរបស់ខ្លួន បើទោះបីខ្សែការពារឆ្នើម Van Dijk បានអវត្តមានដោយសារតែបញ្ហារបួសក៏ដោយ។ ទោះបីជាយ៉ាងណា លោក Klopp បានបញ្ជាក់ថា Midtjylland គឺជាគូប្រកួតដ៏ខ្លាំងមួយដែលមិនអាចមើលស្រាលបានឡើយ ហើយក្រុមស្ថិតក្នុងក្របខ័ណ្ឌ Premier League របស់លោក មិនបានចាត់ទុកពួកគេជាក្រុមតូចឡើយ។ នៅមុនពេលការប្រកួតនាកីឡដ្ឋាន Anfield នៅរាត្រីនេះ លោក Klopp បានប្រាប់អ្នកយកព័ត៌មានថា៖ «យើងមិនចាត់ទុកក្រុម Midtjylland ជាក្រុមតូចមួយឡើយ។
ពួកគេស្ថិតនៅក្នុងការប្រកួតនេះ ដោយសារតែពួកគេបានទទួលសិទ្ធិដើម្បីប្រកួត»។ លោកបានបន្ថែមទៀតថា៖ «ខ្ញុំដឹងរឿងរ៉ាវរបស់ក្លិបនេះ និងសមិទ្ធិផលដែលពួកបានព្យាយាមសម្រេចឲ្យបាន។ នោះគឺជាគម្រោងដ៏គួរឲ្យចាប់អារម្មណ៍មួយ។ កាលពី៥ឆ្នាំមុន ក្នុងពេលខ្ញុំសម្រាកពីការងារ ខ្ញុំចាប់អារម្មណ៍ក្នុងការធ្វើដំណើរទៅកាន់ទីនោះ ដើម្បីមើលពីចំណុចផ្សេងៗដែលស្រេចបាន ប៉ុន្តែ បន្ទាប់មក ខ្ញុំបានចុះហត្ថលេខាជាមួយនឹង Liverpool»៕
ប្រភពព័ត៌មាន៖ AFP
