បរទេស៖ លោក Jurgen Klopp សង្ឃឹមថា លោកនឹងជួបសំណាងជាលើកទី៤ ស្របពេលដែលអ្នកចាត់ការទូទៅរបស់ Liverpool រូបនេះ សម្លឹងរកការដណ្តើមបានជ័យជម្នះជាលើកដំបូងនៅលើទឹកដីក្រុម Napoli នៅពេលដែលក្រុមម្ចាស់ជើងឯករងនៃក្របខ័ណ្ឌ Champions League កាលពីរដូវកាលមុនរបស់លោក ចាប់ផ្តើមដំណើរស្វែងរកជ័យជម្នះនៅរាត្រីនេះ។
Liverpool ត្រូវបានចាប់ឆ្នោតឲ្យស្ថតិនៅជាមួយនឹងក្រុម Ajax, Rangers និង Napoli នៅពេលនេះ និងចាប់ផ្តើមធ្វើការប្រកួតបើកឆាកក្នុងពូល A នៅកីឡដ្ឋាន Stadio Diego Armando Maradona។ ប៉ុន្តែ លោក Klopp មិនបានជួបលទ្ធផលល្អពីការធ្វើដំណើរទៅប្រកួតលើទឹកដីក្រុម Napoli ចំនួន៣លើកកាលពីមុនឡើយ ក្រោយពីចាញ់ ២-១ ពេលដឹកនាំក្រុម Dortmund ក្នុងឆ្នាំ២០១៣ មុននឹងចាញ់ ១-០ ជាមួយនឹងក្រុម Liverpool ក្នុងឆ្នាំ២០១៨ និង ២-០ នៅឆ្នាំបន្ទាប់។ ជាមួយគ្នានេះ Liverpool ក៏ជួបវិបត្តិបញ្ហារបួសកីឡាករក្នុងតំបន់បម្រើផងដែរ ប៉ុន្តែ ពួកគេបាននាំយកខ្សែបម្រើ Arthur ពី Juventus ដើម្បីដោះស្រាយវិបត្តិរបស់ខ្លួន។
ប៉ុន្តែ ទោះបីជាយ៉ាងណា គ្រូបង្វឹកសញ្ជាតិអាល្លឺម៉ង់រូបនេះ បានបញ្ជាក់ថា នឹងមិនចូលលេងនៅរាត្រីនេះឡើយ ដោយសារតែរូបគេត្រូវផ្តោតលើការហ្វឹកហាត់បន្ថែមទៀត ក្រោយពីខកខានក្នុងការហ្វឹកហាត់មួយរយៈនៅ Juventus។ លោកបានឲ្យដឹងថា៖ «Arthur ត្រូវការលេងជាមួយនឹងបាល់ទាត់ពេលនេះ ជាពិសេសការហ្វឹកហាត់។ រូបគេមិនបានហ្វឹកហាត់មួយរយៈនៅ Juventus ហេតុនេះ រូបគេត្រូវការពេលហ្វឹកហាត់ឲ្យបានច្រើន មុននឹងអាចចូលលេងបាន»៕
ប្រភពព័ត៌មាន៖ BBC
