បរទេស៖ លោក Jurgen Klopp បានចាត់ទុកឱកាសរបស់ក្រុម Liverpool ក្នុងការឈ្នះពានក្របខ័ណ្ឌ Premier League គឺជា «រឿងមិនទំនង តែអាចទៅរួច» ក្រោយពីក្រុមកំពុងតែប្រមាញ់ពានបួនមួយនេះ បានធ្វើឲ្យការប្រជែងដណ្តើមបានឈានដល់ថ្ងៃចុងក្រោយនៃរដូវកាលនេះ ក្រោយពីបានកត់ត្រាជ័យជម្នះក្នុងលទ្ធផល ២-១ លើក្រុម Southampton កាលពីថ្ងៃអង្គារ ទី១៧ ខែឧសភា។
ក្រោយពីក្រុម Liverpool បានផ្តួលក្រុម Chelsea ដោយការស៊ុតបាល់ប៉េណាល់ទី ក្នុងការប្រកួតដណ្តើមពាន FA Cup វគ្គផ្តាច់ព្រ័ត្រ ត្រឹមតែរយៈពេល៣ថ្ងៃមុននេះ លោក Klopp បានប្រថុយដោយផ្លាស់ប្តូរកីឡាករ៩នាក់ នាកីឡដ្ឋាន St Mary’s។ បើទោះបីបានប្រើប្រាស់កីឡាករបម្រុងច្រើន និងដេញតាមពីក្រោយគ្រាប់បាល់របស់ Nathan Redmond ក៏ដោយ ប៉ុន្តែ ក្រុម Liverpool បានវាយវិញតាមរយៈគ្រាប់បាល់បញ្ចូលទីរបស់កីឡាករ Takumi Minamino និង Joel Matip។ ក្រុមហង្សក្រហមមួយនេះ ដេញតាមពីក្រោយក្រុម Manchester City ត្រឹមតែ១ពិន្ទុប៉ុណ្ណោះ ស្របពេលដែលក្រុមទាំង២ នៅសល់១ប្រកួតដូចគ្នា។
ការប្រជែងដណ្តើមពានអស់រយៈពេលដ៏យូរ នឹងធ្លាក់ទៅលើដៃក្រុម Man City ប្រសិនបើពួកគេផ្តួលក្រុម Aston Villa នាកីឡដ្ឋាន Etihad នៅថ្ងៃអាទិត្យ។ លោក Klopp បានឲ្យដឹងថា៖ «ពិតណាស់ វាមិនទំនងឡើយ ពីព្រោះ Man City លេងលើទឹកដីខ្លួនឯងជាមួយនឹងក្រុម Aston Villa ដែលទើបតែលេងការប្រកួតនៅថ្ងៃព្រហស្បតិ៍។ វាអាចទៅរួច វាមិនទំនង ប៉ុន្តែ អាចទៅរួច»៕
ប្រភពព័ត៌មាន៖ Channel News Asia
