បរទេស៖ លោក Zinedine Zidane គ្រូបង្វឹករបស់ក្រុម Real Madrid បានបញ្ជាក់ថា ពួកគេមិនអាចធ្វើឲ្យមានការភ្លាត់ស្នៀតទៀតឡើយ ប្រសិនបើពួកគេចង់ឈ្នះកៅអីទៅលេងក្នុងក្របខ័ណ្ឌ Champions League វគ្គចាញ់ធ្លាក់ ហើយកីឡាករត្រូវតែត្រៀមខ្លួនឲ្យបានរួចរាល់សម្រាប់ការប្រកួតប្រជែងលើភាពរឹងមាំផ្នែករាងកាយមួយផ្សេងទៀតនៅលើទឹកដីខ្លួនឯងពេលប៉ះក្រុម Inter Milan នៅរាត្រីនេះ។
ក្រុមម្ចាស់ជើងឯកអេស្ប៉ាញមួយនេះ កំពុងតែស្ថិតនៅបាតតារាងនៃពូល B ដោយមានត្រឹមតែ១ពិន្ទុគត់ពីការប្រកួត២លើក ក្រោយពីចាញ់ក្រោមស្នាដៃក្រុម Shakhtar Donetsk ៣-២ នៅមុនពេលបញ្ចប់ក្នុងលទ្ធផលស្មើ ២-២ នៅលើទឹកដីក្រុម Borussia Moenchengladbach កាលពីសប្តាហ៍មុន។ លោក Zidane បានប្រាប់សន្និសីទសារព័ត៌មានកាលពីថ្ងៃចន្ទថា៖ «Inter គឺជាក្រុមដ៏ខ្លាំងមួយ មានភាពរឹងមាំផ្នែករាងកាយ និងលេងបាល់ទាត់យ៉ាងល្អ។ នេះគឺជាវគ្គផ្តាច់ព្រ័ត្រសម្រាប់យើង»។
គ្រូបង្វឹករូបនេះបានបន្ថែមទៀតថា៖ «វាតែងតែមានការពិភាក្សាគ្នាជាច្រើននៅក្រៅទីលានអំពីអ្វីដែលយើងត្រូវតែផ្លាស់ប្តូរ ប៉ុន្តែ កីឡាករទាំងអស់សុទទ្ធសឹងមានការប្រកួតប្រជែងខ្លាំង។ ពួកគេចង់ឈ្ន ហើយខ្ញុំអាចនិយាយបែបនេះក្នុងនាមជាគ្រូបង្វឹកម្នាក់។ យើងតែងតែចង់ឈ្នះរាល់ប្រកួតដែលយើងចូលរួម។ យើងតែងតែចង់បង្ហាញថា យើងជាក្រុមខ្លាំង»៕
ប្រភពព័ត៌មាន៖ Channel News Asia
