បរទេស៖ លោក Pep Guardiola ពេញនឹងជម្រើសនៃការមានខ្សែប្រយុទ្ធដ៏រឹងមាំម្នាក់សម្រាប់ការប្រកួតក្របខ័ណ្ឌ Premier League ដ៏រំភើបមួយជាមួយនឹងក្រុម Liverpool នៅថ្ងៃអាទិត្យ ចុងសប្តាហ៍នេះក្រោយពី Gabriel Jesus បានអបអរការវិលត្រឡប់ពីរបួសរបស់គេជាមួយនឹងការស៊ុតបាល់បញ្ចូលទី១គ្រាប់ ក្នុងពេលក្រុមខ្លួនទទួលជ័យជម្នះ ៣-០ លើក្រុម Olympiakos ក្នុងការប្រកួតក្របខ័ណ្ឌ Champions League កាលពីថ្ងៃអង្គារ។
Man City កំពុងតែធ្វើដំណើរឆ្ពោះទៅកាន់វគ្គ១៦ក្រុមចុងក្រោយ ដោយងាយ ក្រោយពីដណ្តើមបាន៩ពិន្ទុពេញពីការប្រកួត៣លើក ក្នុងពូល C ក្រោមជំនួយនៃការបង្ហាញពីទម្រង់លេងយ៉ាងល្អរបស់ Ferran Torres។ តារាឆ្នើមអេស្ប៉ាញមួយនេះ បានក្លាយជាកីឡាករវ័យក្មេងទី៣ដែលបានស៊ុតបាល់បញ្ចូលទីក្នុងការប្រកួតក្របខ័ណ្ឌ Champions League ៤លើកជាប់ៗគ្នា នៅពេលដែលរូបគេបានរកគ្រាប់បាល់បើកឆាកនៅនាទី ទី១២។ ប៉ុន្តែទោះបីជាយ៉ាងណា ក្រុមរបស់អង់គ្លេស មិនបានបង្ហាញពីភាពមុតស្រួចខ្លាំងឡើយ ក្នុងរយៈពេលប៉ុន្មានសប្តាហ៍ចុងក្រោយនេះក្នុងក្របខ័ណ្ឌ Premier League ពេលលេងដោយគ្មានខ្សែប្រយុទ្ធកណ្តាលម្នាក់ ក្រោយពី Jesus និង Sergio Aguero បានជួបបញ្ហារបួសដូចគ្នានៅដើមរដូវកាលនេះ។ Jesus ត្រូវបានដាក់ឲ្យចូលលេងនៅរយៈពេល១៥នាទីចុងក្រោយ ដើម្បីពង្រឹងភាពរឹងមាំរបស់គេ និងបានស៊ុតបាល់បញ្ចូលទីក្រោយពីលេងបានត្រឹមតែ១១នាទី ដើម្បីបន្ថែមការនាំមុខរបស់ក្រុម Man City។
លោក Guardiola បានឲ្យដឹងថា៖ «យើងបានលេងយ៉ាងល្អនៅតង់ទី១ ប៉ុន្តែ ជាអកុសល្យ យើងមិនអាចបញ្ចប់ការប្រកួតនេះដោយងាយឡើយ ដោយសារតែយើងលំបាកក្នុងការរកគ្រាប់បាល់ទី២។ ប៉ុន្តែ Gabriel រកបានគ្រាប់បាល់ដ៏មិនគួរឲ្យជឿ ហើយនេះគឺជាដំណឹងល្អដែលរូបគេត្រឡប់មកចូលលេងវិញ»៕
ប្រភពព័ត៌មាន៖ Channel News Asia
