បរទេស៖ Liverpool គឺជាក្រុមម្ចាស់ការពារតំណែងជើងឯក ហើយបច្ចុប្បន្នកំពុងតែនាំមុខលើកំពូលតារាងនៃក្របខ័ណ្ឌ Premier League នៅរដូវកាលនេះ ប៉ុន្តែ លោក Mark Lawrenson ដែលជាអតីតវីរុសបុរសរបស់ក្លិបហង្សក្រហមមួយនេះ ព្យាករថា ពួកគេនឹងរងបរាជ័យពេលជួបក្រុម Manchester City ចុងសប្តាហ៍នេះ។
Man City បានបញ្ចប់ក្នុងចំណាត់ថ្នាក់លេខ២ បន្ទាប់ពី Liverpool ក្នុងរដូវកាលឆ្នាំ២០១៩-២០២០ និងកំពុងតែដេញតាមពីក្រោយក្រុមហង្សក្រហម៥ពិន្ទុ ប៉ុន្តែ នៅសល់១ប្រកួតក្នុងដៃ។ ក្រុមទាំង២ នឹងត្រូវជួបគ្នានាកីឡដ្ឋាន Etihad នៅថ្ងៃអាទិត្យ ចុងសប្តាហ៍នេះ។ ក្រុមទាំង២ មិនបានបង្ហាញពីទម្រង់លេងប្រកបដោយការជឿជាក់នាពេលថ្មីៗនេះឡើយ ហើយក្រុមទាំង២ កំពុងតែមានបញ្ហាដោយសារតែរបួសកីឡាករដូចគ្នា។ សម្រាប់ការប្រកួតនាពេលខាងមុខនេះ។
លោក Lawrenson អ្នកអធិប្បាយឲ្យទូរទស្សន៍ BBC បានឲ្យដឹងថា៖ «ខ្ញុំដឹងថា ជាធម្មតា ខ្ញុំមិនគិតថា Liverpool ចាញ់ឡើយ ប៉ុន្តែ ខ្ញុំមានអារម្មណ៍ថា នេះគឺជាការប្រកួតដ៏អស្ចារ្យសម្រាប់តំបន់ការពារទាំងសងខាង ហើយនៅពេលនេះ Liverpool មានភាពមិនច្បាស់ទៅលើតំបន់ការពាររបស់ខ្លួន»។ ស្របពេលដែលព្យាករថា Liverpool នឹងចាញ់ក្រុម Man City ២-០ លោក Lawrenson បានបន្ថែមទៀតថា៖ «លោក Klopp គ្រូបង្វឹករបស់ Liverpool បានធ្វើការសម្រេចចិត្តជាច្រើនដើម្បីពង្រឹងទាំងតំបន់ការពារ និងប្រយុទ្ធ»៕
ប្រភពព័ត៌មាន៖ Manchester Evening News
