បរទេស៖ ក្រុមបាល់ទាត់ជម្រើសជាតិស្កុតឡេន បានឈានសិទ្ធិទៅលេងក្នុងយុទ្ធនាការអន្តរជាតិដ៏ធំជាលើកដំបូង បើគិតចាប់តាំងពីឆ្នាំ១៩៩៨ តាមរយៈការឈ្នះកៅអីទៅលេងក្នុងព្រឹត្តិការណ៍ Euro ឆ្នាំ២០២០ តាមរយៈការដណ្តើមបានជ័យជម្នះក្នុងការស៊ុតបាល់ប៉េណាល់ទី ៥-៤ លើក្រុមជម្រើសជាតិស៊ែប៊ី ក្រោយពីបានបញ្ចប់ក្នុងលទ្ធផលស្មើ ១-១ ក្នុងទីក្រុង Belgrade។
សំណាងអាក្រក់របស់ក្រុមជម្រើសជាតិស្កុតឡេន នៃការមិនធ្លាប់ឈានទៅប្រកួតយុទ្ធនាការធំៗក្នុងរយៈពេល២ទសវត្សរ៍ ហាក់ដូចជានៅបន្ត នៅពេលដែលគ្រាប់បាល់តែតបញ្ចូលទីរបស់កីឡាករ Luka Jovic បានធ្វើឲ្យការប្រកួតឈានដល់នាទីបន្ថែម១៥នាទី២ដង។ គ្រាប់បាល់បើកឆាករបស់កីឡាករ Ryan Christie បានជួយឲ្យក្រុមភ្ញៀវមានគ្រាប់បាល់នាំមុខមុន ក្នុងពេលដែលក្រុមរបស់លោក Steve Clarke បានបង្ហាញពីទម្រង់លេងយ៉ាងល្អ។ ប៉ុន្តែ មិនខុសអ្វីពីការដណ្តើមបានជ័យជម្នះលើក្រុមជម្រើសជាតិអ៊ីស្រាអែល ក្នុងវគ្គពាក់កណ្តាលផ្តាច់ព្រ័ត្រឡើយ ខណៈដែលក្រុមជម្រើសជាតិស្កុតឡេន បានគ្រប់គ្រងអារម្មណ៍យ៉ាងល្អក្នុងពេលស៊ុតបាល់ប៉េណាល់ទី មុននឹងដណ្តើមបានជ័យជម្នះ នៅពេលដែលអ្នកចាំទី David Marshall បានសង្គ្រោះបាល់ពីការស៊ុតរបស់កីឡាករ Aleksandar Mitrovic។
លោក Clarke បានឲ្យដឹងថា៖ «នៅពេលនេះយើងមិនបានធ្វើឲ្យពួកគេបាក់មុខឡើយ។ ប្រទេសទាំងមូល អាចមានមោទនភាព ប៉ុន្តែ គ្មាននរណាមានមោទនភាពជាងកីឡាករនៅលើទីលានឡើយ»។ Christie និងប្រធានក្រុម Andy Robertson បានសម្តែងនូវអារម្មណ៍ដ៏រំភើបរបស់ខ្លួន ខណៈដែលបច្ចុប្បន្ន ស្កុតឡេន អាចផ្តោតទៅលើយុទ្ធនាការដ៏ធំមួយជាលើកដំបូងបានហើយ៕
ប្រភពព័ត៌មាន៖ Channel News Asia
