បរទេស៖ ខ្សែបម្រើដ៏មានឥទ្ធិពល Kevin De Bruyne របស់ក្លិប Manchester City បានបញ្ជាក់ថា ការផ្លាស់ប្តូរជាបន្តបន្ទាប់ទៅលើច្បាប់ដៃប៉ះបាល់ ក្នុងរយៈពេលប៉ុន្មានឆ្នាំចុងក្រោយនេះ បានធ្វើឲ្យកីឡាករនៅលើទីលានប្រកួត មានការភាន់ច្រឡំ នៅពេលដែលការកាត់សេចក្តីផ្សេងៗបានកើតឡើងចំពោះរូបគេ។
Man City បានរងនូវការខកចិត្ត ក្រោយពីគ្រាប់បាល់តាមស្មើនៅតង់ទី១របស់ខ្សែការពារ Aymeric Laporte ក្នុងពេលចាញ់ក្រុម Tottenham Hotspur ក្នុងលទ្ធផល ២-០ កាលពីថ្ងៃអាទិត្យ មិនត្រូវបានអនុញ្ញាតឲ្យយកជាផ្លូវការ ក្រោយពីឧបករណ៍តាមដាននៅលើទីលានប្រកួត បានបង្ហាញថា Gabriel Jesus បានយកដៃប៉ះបាល់ មុននឹងមានគ្រាប់បាល់បញ្ចូលទី។ De Bruyne ប្រធានក្រុមនៃក្រុម Man City បានប្រាប់ទូរទស្សន៍ Sky Sports ថា៖ «និយាយឲ្យត្រង់ទៅ ខ្ញុំលែងដឹងច្បាប់អ្វីទៀតឡើយ។ ខ្ញុំបានគិតថា ប្រសិនបើការប៉ះបាល់នៅផ្នែកខាងលើនៃដៃនោះមិនមែនជាការយកដៃប៉ះបាល់ឡើយ ស្របពេលដែលមានការផ្លាស់ប្តូរច្បាប់ជាច្រើន»។
កីឡាកររូបនេះបានបន្ថែមទៀតថា៖ «អ្វីដែលយើងអាចនិយាយបាន ខ្ញុំបានលេងបាល់ទាត់អាជីពអស់រយៈពេល១២ឆ្នាំហើយរយៈពេល៩ឆ្នាំដំបូង មិនមានការផ្លាស់ប្តូរច្បាប់ឡើយ ហើយរយៈពេល៣ឆ្នាំចុងក្រោយនេះ មានការផ្លាស់ប្តូរជាច្រើន។ ខ្ញុំមិនដឹងថា មូលហេតុអ្វីឡើយ»៕
ប្រភពព័ត៌មាន៖ Channel News Asia
